Çfarë duhet të hamë për të fjetur më mirë? Ushqimet që ndihmojnë për një gjumë më cilësor

Studiuesit analizuan lidhjen mes ushqimeve të konsumuara gjatë ditës dhe cilësisë së gjumit gjatë natës, duke vërejtur se një dietë e larmishme, e pasur me fruta, perime, drithëra integrale, bishtajore dhe fruta të thata, lidhet me përmirësime në disa aspekte të gjumit.

Cilat ushqime ndihmojnë për një gjumë më të mirë?
Ndër ushqimet që rekomandohen për një regjim ushqimor të shëndetshëm, i cili mund të ndihmojë edhe në përmirësimin e gjumit, janë:

Drithërat integrale: orizi kaf, quinoa dhe tërshëra.
Bishtajoret: fasulet e zeza, thjerrëzat dhe qiqrat.
Frutat: mollët, manaferrat dhe bananet.
Perimet: spinaqi, brokoli dhe lakra.
Frutat e thata dhe farat: arrat, pekanët dhe farat e kungullit.

Sipas Marie-Pierre St-Onge, profesoreshë e mjekësisë ushqimore në Qendrën Mjekësore Irving të Universitetit Columbia, ushqimet me përmbajtje të lartë fibrash dhe fitonutrientësh duhet të kenë një vend të rëndësishëm në dietën e personave që synojnë të përmirësojnë gjumin.

Sipas studiuesve, një dietë e pasur me fibra gjatë ditës lidhet me gjumë më çlodhës dhe me një përqindje më të lartë të fazës REM, e cila lidhet me konsolidimin e kujtimeve dhe ëndrrat.

Gjithashtu, konsumimi i një larmie ushqimesh bimore, veçanërisht atyre pak të përpunuara, si fasulet, thjerrëzat, arrat, frutat dhe perimet, u shoqërua me rrahje më të ulëta të zemrës gjatë natës.

Studiuesit theksojnë se disa përbërës të frutave dhe perimeve mund të ndikojnë në receptorët GABA në tru, duke pasur një efekt qetësues mbi sistemin nervor dhe duke ndihmuar procesin e gjumit.

Studimi vuri në dukje se vaktet më të rënda në mbrëmje mund të lidhen me një kohëzgjatje pak më të madhe të gjumit. Megjithatë, kjo nuk do të thotë domosdoshmërisht se gjumi është më cilësor.

Top Channel