Bono flet për bashkëpunimin me Ed Sheeran: Ai nuk donte që unë ta përfshija në politikë

Kënga, ku merr pjesë edhe muzikanti ukrainas Taras Topolia, është shkruar nga këndvështrimi i një ushtari ukrainas gjatë luftës me Rusinë. EP-ja “Days of Ash” u publikua në shkurt 2026 dhe përmban gjashtë këngë.

Bono tregoi për “Rolling Stone UK” se gjatë punës për këngën Sheeran e kishte pyetur: “Nuk do të më përfshish në politikë, apo jo?”.

“Unë i thashë: ‘Ai ushtar që na frymëzoi të donte ty, Ed, dhe ti ke punuar në këtë këngë’”, rrëfeu Bono.

Sipas tij, Sheeran iu përgjigj se dëshironte ta mbante të lirë atë që bënte. Bono tha se ky reagim e bëri të kuptonte se nuk mund t’u bëhet presion artistëve për të marrë një qëndrim politik.

Ed Sheeran Told U2 He Didn’t Want to ‘Get Into Politics’ While Making Track About Ukraine’s War With Russia, Says Bono https://t.co/c04e1uexNg

— People (@people) October 1, 2026

Bono foli gjithashtu për polemikat e fundit rreth Ed Sheeran dhe reperit Macklemore, i cili u largua nga turneu amerikan i Sheeran pas deklaratave të tij publike në mbështetje të palestinezëve.

Bono tha se nuk dëshironte ta kthente çështjen në një përballje personale mes dy artistëve.

“Për sa i përket Ed dhe Macklemore, nuk duhet ta personalizojmë atë që po ndodh”, tha ai, duke iu referuar edhe komentit të producentit Brian Eno se yjet e popit janë si “peshq të vegjël” në një det të madh forcash politike dhe fetare.

Ed Sheeran ka deklaruar më herët se vendimi për largimin e Macklemore nga turneu nuk ishte i tij, duke thënë se kontrata e reperit ishte me promotorin dhe jo me të.

Pas largimit të Macklemore, disa prej artistëve të tjerë që ishin pjesë e turneut u tërhoqën gjithashtu. Macklemore më pas njoftoi një turne të quajtur “Free Palestine” dhe tha se do të dhuronte të ardhurat e tij nga turneu i Sheeran për organizata që mbështesin palestinezët.

Edhe bateristi i U2, Larry Mullen Jr., foli për përfshirjen e artistëve në çështje politike, duke iu referuar ideve të Brian Eno dhe Bob Geldof.

Mullen tha se artistët kanë të drejtë të zgjedhin nëse duan apo jo të përfshihen në çështje politike dhe se nuk është detyrë e të tjerëve t’i kritikojnë për këtë zgjedhje.

Ai kritikoi gjithashtu ndikimin e promotorëve ose pronarëve të pasur të ambienteve ku zhvillohen koncertet mbi deklaratat dhe veprimtarinë e artistëve.

“Kemi folur për këtë, dhe nëse do ta zbatonim këtë logjikë te U2, do të kishim mbaruar deri te ‘Sunday, Bloody Sunday’”, tha Mullen, duke iu referuar një prej këngëve më të njohura të grupit.

Bono, ndërkohë, e ka përshkruar bashkëpunimin me Sheeran si një projekt që u zhvillua pavarësisht rezervave të këngëtarit britanik për përfshirjen në tema politike. “Yours Eternally” është një prej këngëve të EP-së “Days of Ash”, ku U2 trajton ngjarje dhe konflikte të kohëve të fundit.

Top Channel