E rëndë në Meksikë, deputeti 42-vjeçar gjendet i vdekur në makinën e tij 04/09 22:46
Skema e ngjyrave
Madhësia e shkrimit
Deklaratat e një prej drejtuesve të Tubimit Kombëtar (RN) kanë shkaktuar reagime të forta në Francë, pasi ai deklaroi se e djathta ekstreme mund të ndërpresë ndihmën ushtarake për Ukrainën nëse vjen në pushtet.
Louis Alliot, nënkryetar i RN-së dhe ish-partneri i Marine Le Pen, u pyet nga BFMTV nëse partia do të “mbyllte rubinetin” e ndihmës për qeverinë e Kievit.
“Po e mbyllim rubinetin”, u përgjigj Alliot, duke argumentuar se Franca përballet me probleme të mëdha në sistemin shëndetësor, arsim dhe ekonomi.
“Sistemi shëndetësor, sistemi arsimor, e gjithë ekonomia, të gjithë janë në varfëri dhe ne ende gjejmë para për të financuar armët”, tha ai, duke shtuar se “duhet të dish si ta ndalosh një luftë”.
Deklaratat kanë shkaktuar menjëherë reagime nga kundërshtarët politikë të RN-së. Edouard Philippe, kandidati i qendrës së djathtë dhe një prej rivalëve kryesorë të Marine Le Pen në garën presidenciale, e akuzoi atë për mbështetje ndaj Moskës.
“Po e mbyllim rubinetin në Ukrainë, që do të thotë se po i shërbejmë Rusisë”, deklaroi Philippe, duke paralajmëruar se dobësimi i Ukrainës përbën “një kërcënim për sigurinë e Evropës dhe Francës”.
Marine Le Pen iu përgjigj kritikave duke kujtuar marrëdhëniet e mëparshme të qeverive franceze me presidentin rus Vladimir Putin. Ajo përmendi vizitën e Putinit në Francë në vitin 2017, si dhe takimin me Dmitry Medvedev, atëherë kryeministër rus, në Le Havre në vitin 2019.
Le Pen, e cila ishte pritur në Kremlin në vitin 2017, theksoi gjithashtu se që prej nisjes së pushtimit rus të Ukrainës ka bërë thirrje për një konferencë të madhe paqeje dhe për një zgjidhje diplomatike të konfliktit.
Në debat u përfshi edhe Gabriel Attal, ish-kryeministër i Francës dhe kandidat në zgjedhjet presidenciale. Ai e cilësoi RN-në si një “parti të huaj” dhe e akuzoi për “nënshtrim ndaj Rusisë”.
Ndërkohë, Olivier Faure, kreu i Partisë Socialiste, shkroi në Platformën X se RN-ja “gjithmonë do ta preferojë Putinin ndaj rezistencës së popullit ukrainas”.
Përplasja vjen në prag të zgjedhjeve presidenciale franceze, ku Marine Le Pen kryeson sipas sondazheve në raundin e parë. Çështja e ndihmës për Ukrainën dhe marrëdhëniet me Rusinë pritet të jetë një prej temave kryesore të fushatës.
Top Channel
