Gjiganti amerikan i naftës zgjeron aktivitetin në Venezuelë, investon mbi 7 miliardë dollarë për rritjen e prodhimit

Kompania Petroindependencia, në të cilën Chevron zotëron 49%, planifikon të investojë më shumë se 7 miliardë dollarë gjatë pesë viteve të ardhshme, me objektiv prodhimin e rreth 600 mijë fuçive naftë në ditë.

Megjithatë, drejtori ekzekutiv i Chevron, Mike Wirth, sqaroi për CNBC se shuma e investimit përfshin një paketë të plotë që do të shpërndahet mes tre sipërmarrjeve të përbashkëta të kompanisë në Venezuelë, të cilat janë aktive në prodhimin e naftës.

Chevron bëri të ditur se ka arritur marrëveshje me autoritetet venezueliane për tre subjektet, duke i hapur rrugë investimeve të ardhshme, zhvillimit të projekteve dhe rritjes së prodhimit.

“Historia e Chevron në Venezuelë daton më shumë se një shekull dhe zgjerimi i pozicioneve tona tregon besimin tonë në potencialin e madh të burimeve të vendit”, deklaroi Wirth.

Prodhimi i Chevron në Venezuelë është rritur gjatë këtij viti. Në janar, kompania prodhonte mesatarisht rreth 240 mijë fuçi në ditë, ndërsa deri në korrik prodhimi kishte arritur në rreth 270 mijë fuçi në ditë. Sipas kompanisë, prodhimi është rritur me rreth 15% që nga fillimi i vitit.

Wirth tha se një rritje prej rreth 300 mijë fuçish në ditë brenda pak vitesh do të përbënte një normë të konsiderueshme rritjeje për industrinë.

Zgjerimi i aktivitetit vjen në një kohë kur Venezuela po përpiqet të rikthejë prodhimin e saj të naftës. Vendi zotëron rezervat më të mëdha të naftës në botë, të vlerësuara në më shumë se 300 miliardë fuçi, ndërsa prodhimi aktual është rreth 1.2 milion fuçi në ditë, shumë më poshtë se niveli maksimal prej mbi 3 milionë fuçish në ditë.

Edhe Eni zgjeron aktivitetin në Venezuelë

Në të njëjtën kohë, edhe kompania italiane e energjisë Eni ka njoftuar një marrëveshje të re me Venezuelën. Marrëveshja e bën kompaninë italiane operator të fushës së naftës Junin 5.

“Nënshkrimi i një marrëveshjeje nafte me Venezuelën është hapi i parë drejt më shumë zhvillimit”, deklaroi drejtori ekzekutiv i Eni, Claudio Descalzi.

Sekretari amerikan i Energjisë, Chris Wright, i cili ndodhet në Karakas për takime me autoritetet vendase, tha se marrëveshje të tjera do të shpallen nga kompanitë e energjisë.

Sipas Wright, prodhimi i naftës në Venezuelë pritet të kalojë 2 milionë fuçi në ditë deri në fund të kësaj dekade.

Zhvillimet vijnë pas ndryshimeve në politikën amerikane ndaj sektorit të naftës venezueliane. Embargoja ndaj naftës bruto të vendit, e vendosur në vitin 2019, u lehtësua në vitin 2023 përmes licencave të operimit, ndërsa administrata Trump i revokoi ato në gjysmën e parë të vitit 2025, përpara se Chevron të merrte një përjashtim që i mundësoi kryesisht ruajtjen e aktiviteteve dhe objekteve të saj.

Sipas Wirth, marrëveshjet e reja janë bërë të mundura edhe nga garancitë e dhëna investitorëve nga autoritetet venezueliane dhe përmirësimet në kushtet kontraktuale e financiare.

Top Channel