Milan ka siguruar shërbimet e një numri 10 të ri, një talent mëngjarash me aftësi për të mbuluar të dyja krahët e sulmit.
Në orët e vona të mbrëmjes të së dielës, Omari Hutchinson mbërriti në Milano, ndërsa të hënën pritet të jetë gati për prezantimin e tij zyrtar. Ai vjen me misionin për të lënë gjurmë në “San Siro”, duke zëvendësuar profilin e lojtarëve si Leão, i saposhitur te Galatasaray.
Kush është ai? I lindur në vitin 2003, anglezi kampion i Evropës me U-21 (2025) u rrit në akademitë e Arsenalit dhe Chelseat, përpara se të shkëlqente me Ipswich Town. Talenti i tij ra në sy që në moshën 12-vjeçare falë një videoje virale në YouTube, e cila bëri që vetë legjenda Pelé t’i kërkonte një foto. Jashtë fushës së blertë, Hutchinson është i dashuruar pas modës; rrogën e tij të parë si futbollist e shpenzoi për një xhup Canada Goose, një çantë Louis Vuitton dhe atlete Balenciaga, të cilat ai i quan me shaka “paketa fillestare e çdo futbollisti”.
Karakteristikat dhe lidhja me Amorim Hutchinson zhvilloi një sezon të vështirë te Nottingham Forest ku, pavarësisht se ishte blerja më e shtrenjtë në historinë e tyre (43.4 milionë euro), nuk gjeti hapësirat e duhura. Tani, 22-vjeçari kërkon rilindjen te Milan nën drejtimin e Ruben Amorim. Ironia e fatit është se goli i tij i parë në Premier League u shënua pikërisht kundër Amorim, duke i prishur debutimin këtij të fundit në stolin e Manchester United.
Në skemën 3-4-2-1 të trajnerit portugez, anglezi përshtatet në mënyrë perfekte në krahun e djathtë. Ai vlerësohet si një lojtar me vizion të jashtëzakonshëm ofensiv, por që ka punuar shumë edhe në fazën mbrojtëse dhe presingun pa top. Ndonëse mbetet një talent i papërpunuar që kërkon kohë për t’u rafinuar plotësisht, Hutchinson ka mentalitetin e duhur për të shkëlqyer në futbollin italian.
Top Channel
