Vatikani investon 100 milionë euro për energjinë e rinovueshme, centrali fotovoltaik do të ndërtohet pranë Romës

Sipas burimeve të cituara nga Reuters, centrali agro-fotovoltaik do të ketë një kapacitet prej 80 deri në 90 megavat, duke e renditur atë ndër impiantet më të mëdha të këtij lloji në Itali.

Projekti do të ndërtohet në pronën Santa Maria di Galeria, në periferinë veriperëndimore të Romës, një sipërfaqe prej rreth 450 hektarësh që është në pronësi të Vatikanit dhe ku prej viteve 1950 ndodhen objektet e transmetimit të Radio Vatikanit.

Një komision i përbashkët Itali-Vatikan u mblodh në fillim të këtij muaji për të nisur procedurat për projektin, pas ratifikimit nga Italia të një marrëveshjeje dypalëshe të vitit 2025, që mundëson zhvillimin e kësaj zone.

Burime të përfshira në diskutime thanë se ndërtimi i centralit mund të zgjasë 18 deri në 24 muaj, duke përfshirë edhe procedurat e licencimit dhe ato administrative. Kontratat për projektin pritet të shpallen në javët e ardhshme.

Projekti parashikon vendosjen e paneleve diellore disa metra mbi tokë, duke krijuar një sistem diellor ku tokat mund të vazhdojnë të përdoren për bujqësi. Hija e krijuar nga panelet ndihmon gjithashtu në uljen e avullimit të ujit dhe në mbrojtjen e bimëve nga kushtet ekstreme të motit.

Panelet, të shoqëruara me një sistem monitorimi, pritet të mbulojnë rreth 200 hektarë, ose pothuajse gjysmën e sipërfaqes së Santa Maria di Galeria.

Centrali do të furnizojë fillimisht me energji objektet e transmetimit të Radio Vatikanit dhe do të kontribuojë në synimin e Vatikanit për të arritur energjinë e nevojshme. Energjia mund të përdoret gjithashtu nga institucione të lidhura me Selinë e Shenjtë, përfshirë spitalin Bambino Gesù në Romë.

Në rast se prodhohet më shumë energji sesa nevojitet, teprica do të vihet në dispozicion të rrjetit elektrik italian.

Vatikani nuk do të përfitojë nga skemat e stimulimit financiar që Italia ofron për familjet dhe bizneset që instalojnë sisteme diellore.

Projekti ishte një nga prioritetet e Papa Françeskut dhe është miratuar edhe nga Papa Leo XIV. Marrëveshja mes Italisë dhe Vatikanit i jep projektit agro-fotovoltaik status të veçantë, të ngjashëm me atë të objekteve të Radio Vatikanit, duke përfshirë përjashtime nga disa taksa dhe tarifa publike italiane.

Sipas marrëveshjes, zbatimi i projektit nuk duhet të krijojë barrë të re apo shtesë për financat publike të Italisë.

Top Channel