Drejtori sportiv i Bayern Munich, Max Eberl, ka folur hapur për situatën e fundit që rrethon yllin e skuadrës, Jamal Musiala.
Përmes një deklarate të fundit, drejtuesi i bavarezëve ka zbuluar detaje rreth gjendjes së lojtarit, duke theksuar se klubi ka qenë i mirëinformuar që në sezonin e kaluar dhe se luhatjet e fundit kanë ardhur si pasojë e një ndryshimi në mjekimin e tij.
Eberl theksoi se ishte vetë dëshira e futbollistit që kjo situatë të bëhej transparente për publikun, ndërsa garantoi mbështetjen maksimale të klubit. “Ne e kemi ditur këtë gjatë gjithë sezonit të kaluar. Ishte dëshira e Jamal-it që kjo gjë të komunikohej. Edhe lojtarët e tjerë ishin në dijeni. Për ne, kjo tashmë është kthyer në një pjesë të jetës së përditshme,” – u shpreh Eberl.
Përfaqësuesi i lartë i klubit gjerman nënvizoi unitetin brenda dhomave të zhveshjes, duke e trajtuar çështjen si një sfidë të përbashkët. “Ne, si familja e FC Bayern, qëndrojmë të bashkuar. Do t’i japim atij gjithë mbështetjen tonë, ashtu siç kemi bërë deri tani, dhe do të vazhdojmë ta bëjmë me përkushtim. Këtë situatë po e kalojmë të gjithë së bashku,” – shtoi ai.
Në fund, drejtori i Bayernit sqaroi edhe arsyen tekniko-mjekësore të shfaqjes së disa episodeve specifike tek mesfushori: “Ai ndryshoi diçka në mjekimin e tij, dhe kjo është arsyeja pse këto situata u bënë më të dukshme. Tani, qëllimi ynë është të rikthehemi aty ku ishim më parë, kur këto situata nuk ndodhnin.”
Klubi bavarez mbetet kështu fuqimisht në krah të talentit 23-vjeçar, me stafin mjekësor dhe drejtuesit që po punojnë për të stabilizuar plotësisht gjendjen e tij, në mënyrë që Musiala të fokusohet vetëm tek paraqitjet në fushën e lojës.
Top Channel
