Rusia shton sulmet ndaj Ukrainës, Zelensky thirrje Trumpit: Na jepni 10% të arsenalit amerikan dhe do të shkatërrojmë raketat balistike ruse

Në një intervistë për CNN nga Kievi, Zelensky tha se Ukraina ka aktualisht vetëm një pjesë shumë të vogël të kapacitetit që i nevojitet për t’u mbrojtur nga sulmet ruse.

Sipas tij, nëse SHBA-ja do t’i shiste Ukrainës 5% të rezervave të saj të raketave Patriot, Kievi do të ishte në gjendje të përballonte dimrin dhe të shpëtonte jetë njerëzish. Por me 10%, pretendon Zelensky, rezultati do të ishte shumë më i madh. “Na shisni 5%, ne do ta kalojmë dimrin dhe do të shpëtojmë jetë njerëzish. Nëse mund të na shisni 10%, ne do të shkatërrojmë të gjitha raketat balistike të rusëve”, tha ai.

Zelensky tha se gjatë këtij viti Ukraina ka pasur dy herë e gjysmë më pak raketa interceptuese sesa në vitin 2025, ndërsa Rusia ka rritur ndjeshëm përdorimin e raketave balistike.

Sipas presidentit ukrainas, situata është bërë veçanërisht e rëndë në Kiev, ku sulmet e njëpasnjëshme po vënë në provë mbrojtjen ajrore të vendit. “Çdo natë keni sulme dhe katër ose pesë herë në muaj kemi sulme masive. Netë të tmerrshme. Njerëzit janë shumë heroikë dhe rezistentë, por janë të lodhur”, tha Zelensky.

Ai zbuloi gjithashtu se prej muajsh po zhvillon një fushatë intensive për të siguruar më shumë interceptorë, duke komunikuar vazhdimisht me aleatët. “Kjo është ajo që jetoj çdo ditë: nga 1% në 5%. Kam disa muaj dhe miliona telefonata”, tha ai.

Zelensky pranoi se disa nga përpjekjet e tij për të siguruar raketa mbeten sekrete, duke thënë se ka bërë marrëveshje dhe ka tentuar edhe shkëmbime për të siguruar sistemet e nevojshme. Ndërkohë, mbetet e paqartë edhe plani për prodhimin e raketave Patriot në Ukrainë.

Presidenti amerikan Donald Trump kishte deklaruar se do t’i lejonte Ukrainës të merrte një licencë për të prodhuar vetë interceptorët, por më vonë shprehu pasiguri për këtë ide.

Zelensky tha se kjo mbetet një nga sfidat më të mëdha me të cilat përballet Ukraina. “Nuk kam tani 5% dhe nuk kam një pranim të tillë. Dhe kjo është për mua një sfidë e madhe”, tha ai.

Në intervistë, presidenti ukrainas foli edhe për përpjekjet për një marrëveshje paqeje. Ai tha se Ukraina kërkon përfshirje më të madhe të SHBA-së, ndërsa akuzoi Vladimir Putinin se nuk ka interes real për t’i dhënë fund luftës. “Putini nuk dëshiron ta ndalojë këtë luftë tani dhe nuk ka presion të mjaftueshëm mbi të tani”, deklaroi Zelensky.

Ai hodhi poshtë gjithashtu mundësinë që Ukraina të dorëzojë territoret e mbetura në Donbas, të kërkuara nga Moska, duke argumentuar se çdo marrëveshje duhet të shoqërohet me garanci të forta sigurie.

Zelensky paralajmëroi edhe për një rrezik më të gjerë, duke thënë se Putin mund të tentojë të testojë unitetin e NATO-s përmes një sulmi ndaj një prej shteteve më të vogla baltike.

Sipas tij, presidenti rus kërkon një fitore të shpejtë dhe mund të synojë një vend më të vogël për të treguar forcë. “Ai dëshiron fitore të shpejtë, 100% i sigurt se do të fitojë, pushtojë, shkatërrojë ose kontrollojë”, tha Zelensky.

Top Channel