Situatë alarmante në Spanjë/ Zjarret përhapen në disa provinca, qindra banorë detyrohen të largohen

Situata më problematike paraqitet në provincat Huelva dhe Castellón, ku zjarrfikësit dhe ekipet e emergjencave po vijojnë luftën me flakët.

Zjarri që shpërtheu të enjten e kaluar në Niebla, në perëndim të Seviljes, ka shkaktuar evakuimin e banorëve nga disa qendra të banuara, përfshirë Berrocal, El Membrillo, El Pozuelo dhe Marigenta.

Sipas Shërbimit Andaluzian për Luftën ndaj Zjarreve Pyjore (INFOCA), rreth 400 persona janë evakuuar deri më tani, ndërsa sipërfaqja e përfshirë nga flakët ka kaluar 4 mijë hektarë.

Gjatë natës, rreth 150 zjarrfikës pyjorë kanë punuar në terren për të frenuar përhapjen e zjarrit.

Ministri rajonal i Presidencës, Shëndetësisë dhe Emergjencave në Andaluzia, Antonio Sanz, e ka cilësuar situatën ende jashtëzakonisht të ndërlikuar, edhe 48 orë pas nisjes së zjarrit.

Sipas tij, ndryshimet e vazhdueshme të drejtimit të erës dhe përhapja e prushit të ndezur po e vështirësojnë ndjeshëm punën e ekipeve në terren.

Ndërkohë, zëvendëspresidentja e tretë dhe ministrja për Tranzicionin Ekologjik, Sara Aagesen, pritet të vizitojë të dielën Postën e Avancuar të Komandës në Niebla, ku do të takohet me drejtuesit e operacionit të emergjencës.

Situatë e vështirë paraqitet edhe në Castellón, ku zjarri në Tírig ka rikthyer ndërhyrjen e mjeteve ajrore për shuarjen e flakëve.

Avionët dhe helikopterët zjarrfikës janë angazhuar që në orët e para të mëngjesit të së dielës, pasi një ditë më parë autoritetet urdhëruan që banorët e komunës së Catí, rreth 700 persona, të qëndronin të izoluar në banesat e tyre.

Rreth 200 efektivë në terren kanë punuar gjatë gjithë natës për të frenuar përhapjen e zjarrit, ndërsa operacioni është vështirësuar nga terreni i thyer dhe prania e një sërë përrenjsh dhe luginash.

Ministri i Emergjencave dhe Brendshme i qeverisë rajonale të Valencias, Juan Carlos Valderrama, deklaroi se zjarri ka përfshirë rreth 395 hektarë, brenda një perimetri prej 15 kilometrash.

Në operacion janë angazhuar rreth 300 persona, 19 mjete ajrore dhe 50 njësi tokësore.

Autoritetet paralajmërojnë se është ende herët për të folur për stabilizimin e situatës. Megjithatë, parashikimet meteorologjike për natën në vijim janë më të favorshme dhe pritet që kushtet e motit të ndihmojnë ekipet e emergjencave.

Zjarri në Tírig është një nga katër zjarret që shpërthyen të premten pasdite në zonat e brendshme të Castellón. Sipas të dhënave paraprake, këto vatra kanë prekur së bashku rreth 244 hektarë.

Sa i përket shkakut të zjarreve, autoritetet dyshojnë se ato mund të jenë shkaktuar nga goditjet e rrufeve gjatë stuhive të së premtes. Hetimet vijojnë nga njësia mjedisore Seprona.

Ndërkohë, situata është përmirësuar në Sierra Engarcerán, në jug të Tírig, ku zjarri i shpërthyer të premten tashmë është vënë nën kontroll.

Qendra e Koordinimit të Emergjencave të Komunitetit të Valencias konfirmoi të dielën se flakët kanë përfshirë rreth 45 hektarë brenda një perimetri prej 4 kilometrash.

Autoritetet kanë hequr gjithashtu urdhrin për izolimin e zonës. Rreth 91 banorët që ishin evakuuar kanë mundur të rikthehen në banesat e tyre, ndërsa 11 persona të tjerë, të cilët ishin strehuar përkohësisht në qendrën sportive Els Ibarsos, janë larguar nga objekti.

Ekipet e emergjencave vijojnë monitorimin e zonave të prekura, ndërsa autoritetet po vlerësojnë situatën për të parandaluar riaktivizimin e vatrave të zjarrit.

Top Channel