Në kampin kuqezi ka nisur zyrtarisht java e vendimeve të mëdha.
Pas një fillimi premtues dhe mjaft dinamik në merkaton e verës, AC Milan gjendet aktualisht në një ngërç të vërtetë. Për të zhbllokuar situatën, trajneri Ruben Amorim dhe drejtuesit e klubit kanë vënë nën vëzhgim rreptë rreth 15 lojtarë, e ardhmja e të cilëve te “Djalli” mbetet e paqartë dhe në fije të perit.
Nevoja për të shitur dhe “holluar” organikën
Qëllimi parësor i Milanit tani është të largojë lojtarët që nuk bëjnë pjesë në projektin e ri të teknikut portugez. Merkatoja hyrëse është e lidhur ngushtë me atë dalëse. Kjo situatë vështirësohet edhe si pasojë e mungesës së një drejtori sportiv të mirëfilltë, çka ka bërë që – kur ka mbetur më pak se një muaj nga mbyllja e afatit kalimtar – klubi të mos ketë finalizuar ende largimet e nevojshme. Hapi i parë në këtë drejtim ka qenë kalimi i talentit Athekame në formë huazimi te skuadra franceze e Lyon-it.
E ardhmja e yjeve dhe objektivat e rinj
Përtej lojtarëve të stolit, sytë janë kthyer edhe nga yjet e skuadrës. Rafael Leao po tundohet nga milionat e ofruara prej klubit të Galatasaray-t, por destinacioni turk nuk e bind plotësisht portugezin. Nga ana tjetër, trajneri Amorim ka dhënë sinjale të qarta se dëshiron ta mbajë sulmuesin në skuadër, duke i mbyllur kështu derën transferimit të tij.
Ndërkohë, Milani po synon të përforcojë ekipin me emra të rinj, por çdo tentativë për afrimin e lojtarëve si Matías Soulé apo Gonçalo Inácio varet drejtpërdrejt nga dy shitje të rëndësishme. Gjithashtu, për rolin e fantazistit është rikthyer sërish në skenë një emër shumë i njohur për tifozët kuqezi: Brahim Diaz, i cili shihet si një mundësi për të shtuar cilësinë pas sulmuesve.
Për Milanin kjo është një javë vendimtare. Ruben Amorim duhet të përcaktojë përfundimisht listën e atyre që do t’i mbijetojnë këtij “spastrimi” dhe atyre që duhet të gjejnë një skuadër të re. Vetëm përmes këtyre sakrificave dhe uljes së numrit të lojtarëve në organikë, klubi do të mund të kompletojë ekipin e ëndrrave për të synuar objektiva madhorë në sezonin e ri.
Top Channel
