Rafael Leao ka tërhequr gjithë vëmendjen kur ka mbërritur në grumbullimin fushor të Milanit në Perth të Australisë.
Sulmuesi portugez, i shoqëruar nga Gonçalo Ramos, u prit në hollin e hotelit nga Serginho dhe Panucci me buzëqeshje të shumta, pavarësisht zërave të vazhdueshëm që e lidhin me një largim nga klubi kuqezi. Ylli portugez e ka pranuar më parë publikisht dëshirën për të ndryshuar ambient, ndërsa vetë drejtuesit e Milanit presin shitjen e tij për të financuar goditjet e fundit në merkaton hyrëse.
Megjithatë, Leao u shfaq mjaft i qetë në kamp stërvitor. Ai u përqafua me trajnerin Ruben Amorim – me të cilin pritet të ketë një bisedë kokë më kokë për të sqaruar hapat e radhës – dhe darkoi me bashkëlojtarët. Sipas raportimit të “Il Corriere della Sera”, ai madje ka bërë shaka me shokët e skuadrës duke u thënë: “Hey, më kishit marrë malli!”
Por, kjo nuk duket e mjaftueshme për të menduar për një kthesë të papritur apo qëndrimin e tij në Milano pas shtatë vitesh bashkëpunim. Rruga duket tashmë e përcaktuar dhe fjalën e fundit do ta ketë merkatoja—në veçanti klubi i Fenerbahçes, që duhet të rrisë ofertën për t’iu afruar kërkesës prej 50 milionë eurosh të vendosur nga Milani.
Top Channel
