Numri një i Federatës Italiane të Futbollit (FIGC) do të takojë palët në një takim jozyrtar në pritje të Këshillit Federal të së martës: në qendër të diskutimeve është edhe emërimi i trajnerit të ri.
Harrojini buzëqeshjet e pak ditëve më parë në Ligë, ku parakaluan, ndër të tjerë, Malagò, Maldini dhe Leonardo. Dështimi i emërimit të Andrea Pirlos si trajner i ri i Kombëtares (lajm i zyrtarizuar nga vetë ish-mesfushori në rrjetet sociale), ka ashpërsuar gjakrat. Tani drejtori teknik i të kaltërve, ashtu si dhe njeriu i tij i besuar brazilian, mund të largohen vërtet. Për ish-kapitenin e Milanit, siç raportojnë shumë burime, çështja ruse është thjesht një pretekst për të minuar autonominë e tij vendimmarrëse. Nga këtu vjen edhe mundësia e një hapi pas, aq sa tashmë po qarkullon emri i Giorgio Chiellinit si pasardhës i mundshëm i tij.
Ndërkohë, Malagò po përpiqet të fitojë kohë. I ftuar në “Il Sole24Ore”, ish-kreu i CONI-t bëri një pasqyrë të situatës: “Trajneri? Që prej mëngjesit të sotëm po marr pafund mesazhe. Do të flas me të gjithë sa më shpejt të jetë e mundur, ashtu siç është e drejtë. Për të rifituar besueshmërinë tonë garuese në nivelet më të larta, ku asgjë nuk është e garantuar, duhet të punojmë me të rinjtë që sot janë nga 13 deri në 16 vjeç. Për këtë arsye, duhet të ndryshojmë të gjithë zinxhirin në aspektin e formimit dhe kulturës, dhe kjo përfshin edhe trajnerin. Është një çështje mbjelljeje, idetë janë shumë të qarta. Po e bëjmë këtë, edhe mes mijëra vështirësive, sepse duhet bërë një transformim. Duhet të kemi parasysh që dikur ishim një vend me në qendër futbollin, ndërsa sot nuk jemi më, pasi ka edhe shumë sporte të tjera”.
Në orët e ardhshme priten zhvillime të rëndësishme: presidenti i Federatës së Futbollit do të takojë palët në Romë, që nga përfaqësuesit e Ligave e deri te delegatët e sportistëve dhe teknikëve, në prag të Këshillit Federal të planifikuar për të martën. Bëhet fjalë për një takim jozyrtar por të rëndësishëm, i parashikuar prej kohësh në orën 18:00, shkruan “Corriere della Sera”, i cili do të vijojë më pas edhe gjatë darkës. Është e qartë që do të diskutohet edhe për trajnerin e ri: Malagò do të përpiqet të masë pulsin e situatës për të bërë një tjetër vlerësim dhe për të provuar ta rinisë punën në mes të kësaj stuhie. Gjithashtu, parashikohet një përballje mes Malagòs, Maldinit dhe Leonardos, pikërisht në ditën që duhej të vuloste ardhjen zyrtare të Pirlos në pankinën e Kombëtares.
Top Channel
