Drejtori i ri teknik i Federatës Italiane të Futbollit (FIGC), Paolo Maldini, ka hedhur poshtë me forcë raportimet e fundit mediatike që sugjeronin se Pep Guardiola kishte kërkuar një pagë stratosferike prej 20 milionë eurosh në vit për të marrë drejtimin e kombëtares italiane.
Ditët e fundit, e ardhmja e stolit të “Axurrëve” është kthyer në temën kryesore të mediave sportive. U përfol gjerësisht se kërkesat e larta financiare të teknikut spanjoll ishin një pengesë e pakapërcyeshme, pasi shifra e lakuar ishte dyfishi i asaj që FIGC ishte e gatshme të ofronte. Megjithatë, Maldini ka ndërhyrë për të qartësuar situatën, duke theksuar se bisedimet nuk po ngecin tek ana financiare.
“Për Pep, aspekti ekonomik nuk është në asnjë mënyrë i rëndësishëm,” deklaroi legjenda italiane. Kjo deklaratë ka rindezur shpresat e tifozëve, duke sugjeruar se Guardiola është i interesuar për sfidën dhe projektin sportiv, dhe jo për llogarinë bankare.
Guardiola kohët e fundit i dha fund një aventure 10-vjeçare të mbushur me trofe te Manchester City dhe fillimisht u raportua se dëshironte të bënte një pushim për të kaluar kohë me familjen e tij. Megjithatë, oferta e Italisë thuhet se nuk është thjesht për rolin e trajnerit, por për të udhëhequr një revolucion total strukturor në futbollin italian.
Takimi mes dyshes Maldini-Guardiola në Barcelonë ka qenë intensiv dhe tekniku spanjoll pritet të japë një përgjigje përfundimtare shumë shpejt. Nëse paratë nuk janë problem, a do të pranojë gjenialiteti i futbollit të ringrejë Italinë? Tifozët mbeten në pritje.
Top Channel
