Protesta e studentëve në Indi përshkallëzohet, policia ndërhyn në Delhi

Sipas raportimeve nga vendngjarja, forcat e policisë mbërritën të pajisura me mjete kundër trazirave dhe përdorën altoparlantë për t’u kërkuar protestuesve të shpërndaheshin, duke argumentuar se nuk kishin leje për të qëndruar në atë hapësirë.

Situata, e cila deri në ato momente ishte e qetë, u përshkallëzua pasi policia nisi të shtyjë disa prej protestuesve. Në zonë u krijua kaos, me njerëz që lëviznin me nxitim në drejtime të ndryshme.

Protestuesit kërkojnë reforma në sistemin arsimor dhe kanë ngritur shqetësime për zhvillimin e provimeve dhe akuzat për rrjedhje të dokumenteve të provimeve kombëtare NEET.

Ndërkohë, liderë të opozitës indiane kanë dalë në mbështetje të studentëve dhe kanë kritikuar ndërhyrjen e policisë.

Presidenti i Kongresit, Mallikarjun Kharge, e cilësoi përdorimin e forcës ndaj studentëve si “sulm ndaj demokracisë”, ndërsa deputetë të tjerë të opozitës kërkuan që protestuesit të trajtohen me respekt.

Deputeti Shashi Tharoor kritikoi gjithashtu veprimin e policisë, duke ngritur pyetjen se pse përdoret forcë ndaj një proteste që, sipas tij, ishte jo e dhunshme.

Përplasja në Jantar Mantar vjen në një kohë kur qeveria indiane po përballet me presion për të dhënë shpjegime mbi menaxhimin e provimeve dhe pretendimet për parregullsi në sistemin arsimor.

Top Channel