Një aksident i rëndë me pasojë dy viktima ka ndodhur pasditen e së martës në aksin rrugor Cërrik-Mollas pranë fshatit Selvias.
Dy automjete janë përplasur me njëri-tjetrin përballë, duke shkaktuar pasoja fatale. Përplasja ka qenë aq e fortë sa të dy automjetet janë shkatërruar plotësisht dhe njëri prej tyre pas përplasjes ka përfunduar në kanal.
Si pasojë e aksidentit, Qemal Çala 63 vjeç dhe Drilon Tabaku 22 vjeç kanë humbur jetën në vendngjarje.
Paraprakisht dyshohet se përplasja ballore ka ardhur si pasojë e parakalimit të gabuar të njërit prej mjeteve dhe shpejtësisë shumë të madhe të lëvizjes.
Në vendin e ngjarjes kanë mbërritur shërbimet e emergjencës, policia dhe grupi hetimor, të cilët kanë nisur punën për zbardhjen e plotë të rrethanave të aksidentit.
Aksidentet rrugore vijojnë të jenë një ndër problematikat më shqetësuese në vend, ndërsa autoritetet u bëjnë apel drejtuesve të mjeteve të tregojnë kujdes maksimal, të respektojnë rregullat e qarkullimit dhe të shmangin shpejtësinë e lartë.
Cërrik / Informacion paraprak
Në aksin rrugor “Mollas–Gostimë”, janë përfshirë në një aksident rrugor automjeti me drejtues shtetasin S. M., 38 vjeç, dhe automjeti me drejtues shtetasin Q. Ç., rreth 63 vjeç.
Si pasojë e përplasjes, kanë humbur jetën drejtuesi i automjetit, shtetasi Q. Ç., si dhe pasagjeri në automjetin e tij, shtetasi D. T., rreth 22 vjeç.
Gjithashtu, është dëmtuar drejtuesi i automjetit tjetër, shtetasi S. M., i cili është transportuar në spital dhe ndodhet nën kujdesin e mjekëve.
Grupi hetimor, nën drejtimin e Prokurorisë, po kryen veprimet procedurale dhe vijon punën për zbardhjen e plotë të rrethanave dhe shkaqeve të aksidentit.
Top Channel
