Vala ekstreme e të nxehtit sjell pasojat e para në SHBA, detyron mbylljen e përkohshme të Panairit Shtetëror Amerikan gjatë festës së 4 Korrikut

Sipas Shërbimit Kombëtar të Motit të SHBA-së, më shumë se 165 milionë njerëz ndodhen nën paralajmërime për temperatura ekstreme në Bregun Lindor dhe rajonin Midwest. Organizatorët e panairit njoftuan se vendimi u mor për të garantuar sigurinë e vizitorëve, vullnetarëve, artistëve dhe stafit, ndërsa aktiviteti pritet të rifillojë në orët e mbrëmjes, kur temperaturat të ulen.

Meteorologët paralajmërojnë se vala e të nxehtit do të vazhdojë gjatë gjithë fundjavës, me temperatura që në disa zona po arrijnë nivelet më të larta të dekadave të fundit.

Në Filadelfia dhe Uashington parashikohen temperatura rreth 41 gradë Celsius, ndërsa disa qytete pritet të regjistrojnë disa ditë radhazi me temperatura mbi 38 gradë.

Për shkak të kushteve të motit, disa aktivitete tradicionale të festës së 4 Korrikut janë shtyrë ose shkurtuar. Në Uashington, autoritetet vonuan hyrjen e publikut për koncertin “A Capitol Fourth”, ndërsa hyrja në National Mall për shfaqjen e fishekzjarrëve u shty për në orët e pasdites. Edhe shfaqja e fishekzjarrëve do të nisë më vonë se zakonisht.

Komisioni “America 250”, i ngarkuar me organizimin e festimeve për 250-vjetorin e pavarësisë së SHBA-së, bëri të ditur se po monitoron nga afër kushtet atmosferike, por aktualisht aktivitetet në qytete si Bostoni, Filadelfia dhe New Yorku pritet të zhvillohen sipas planit.

Presidenti Donald Trump pritet të marrë pjesë në aktivitetet e 4 Korrikut dhe të mbajë një fjalim në ambient të hapur, pavarësisht temperaturave të larta që parashikohen për fundjavën.

Shërbimi Kombëtar i Motit ka paralajmëruar se kushtet aktuale paraqesin rrezik të lartë për shëndetin, duke u bërë thirrje qytetarëve të shmangin ekspozimin e zgjatur në diell, të konsumojnë lëngje dhe të kufizojnë aktivitetet fizike gjatë orëve më të nxehta të ditës.

Top Channel