IA pa rregulla në Ballkan, analiza: Po përdorin Inteligjencën Artificiale pa një kuadër të plotë ligjor

Në Bosnje dhe Hercegovinë, Kosovë, Mal të Zi dhe Serbi mungojnë ligje të posaçme për përdorimin e chatbote-eve apo sisteme të tjera të AI, e në shumicën e rasteve nuk ekzistojnë as rregulla të brendshme dhe as evidencë e qartë për mënyrën se si përdoren këto teknologji, shkruan Radio Europa e Lirë, në një kohë përdorimi i tyre është tashmë real dhe masiv.

Vendet e rajonit janë në faza të ndryshme përafrimi me standardet e Bashkimit Europian, i cili ka miratuar Aktin për Inteligjencën Artificiale (AI Act)- ligji i parë gjithëpërfshirës në botë për këtë fushë. BE-ja parashikon ndalim të disa përdorimeve dhe rregulla të rrepta për sigurinë, transparencën dhe mbrojtjen e të dhënave. Në Bosnje dhe Hercegovinë, disa institucione lejojnë përdorimin e kufizuar të AI-it vetëm për detyra teknike, por ndalojnë futjen e të dhënave personale ose sekrete në platformat publike.

Në Kosovë, përdorimi zyrtar është ende i kufizuar, por po testohen zgjidhje digjitale dhe po punohet për harmonizim me rregullat e BE-së. Mali i Zi dhe Serbia janë më të avancuara në përdorimin praktik të IA-së në shërbime publike, përfshirë chatbotë në administratën tatimore dhe portale qeveritare, ndërsa po përgatisin edhe korniza ligjore të reja. Ekspertët paralajmërojnë se mungesa e rregullave rrit rrezikun për keqpërdorim të të dhënave personale dhe sigurisë së informacionit.

Ata theksojnë se AI mund të ndihmojë në përshpejtimin e punës, por përgjegjësia përfundimtare mbetet gjithmonë te njeriu që e përdor.

Top Channel