E ardhmja e Armando Brojës mund të jetë në Serinë A. Në orët e fundit në median italiane po qarkullon lajmi se sulmuesi i kombëtares shqiptare është vënë në shënjestrën e Cagliarit për të përforcuar repartin e sulmit
Drejtuesit e klubit sard kërkojnë të kenë në skuadër një futbollist me forcë fizike, të shpejt dhe me nuhatjen për golin dhe kanë parë të Armando Broja profilin ideal.
Lajmi bëhet i ditur nga gazetari i specializuar i merkatos, Gianluca di Marzio sipas të cilit, Broja që aktualisht është në radhët e Burnley pëlqehet shumë te Cagliari pikërisht për karakteristikat fizike dhe teknike që konsiderohen ideale për lojën e skuadrës sarde që në javët e ardhshme pritet të bëjë ofensivën vendimtare për të.
I formuar në akademinë e Chelsea, Broja ka pasur mundësinë për të shkelur skenat më të rëndësishme të futbollit. Megjithatë Broja nuk është një emër i panjohur në ambientet e futbollit italian. Në të kaluarën, sulmuesi kuqezi është kërkuar me këmbëngulje edhe nga Milani, por një transferim i tij në Milanello u sfumua.
Transferimi i Brojës te Cagliari duket se është një bast i vërtetë për klubin sard duke parë edhe statistikat e sulmuesit. Në sezonin e tij te Burnley, Broja ka shënuar 1 gol e ka dhënë 1 asist në 24 ndeshje, shumë pak për një sulmues si ai. Por një kalim i mundshëm i tij te klubi sard mund të rezultojë një lëvizje e goditur për sulmuesin shqiptar pasi Cagliari është i bindur se mund ta rilindë Armando Brojën dhe të kthejë atë në futbollistin që kemi njohur të gjithë dikur.
Top Channel
