“Kryetarë partish dhe deputetë t’i qëndrojnë larg mikrofonit”, një prej organizatorëve të protestës: Të flasin figura publike, nga arti e shkenca, jo më shumë se 2-3 minuta

Në një reagim publik, ai thekson se protesta ka ardhur si pasojë e shqetësimeve për ndërhyrje në zona të mbrojtura dhe problemeve të akumuluara sociale, ekonomike dhe të pronësisë, të cilat sipas tij kanë shkaktuar zemërim të gjerë qytetar.

Sipas organizatorëve, protesta është një lëvizje qytetare e pakthyeshme që synon ndryshime të thella politike në vend.

Reagimi i plotë i Andi Tepelena:

Një sqarim i detyruar për opinionin publik!

Kjo shkëndijë zemërimi erdhi si pasojë e alarmit që ngritën ambjentalistët kur konstatuan gardhimin e 600 hektarë nga ana e Kastratit e zonës së mbrojtur Pishë Poro- Zvërrnec-Nartë, Zonë e Mbrojtur. Dhuna që ushtruan më pas banditët e kompanisë private security, ndaj banorit të zonës dhe protestuesve, solli reagimin e menjëhershëm tek Drejtoria e Policisë. Pas kësaj pjesa tjetër, është një zemëratë popullore si pasojë e problemeve të akumuluara, si shpopulllimi dramatik, korrupsioni, kosto e papërballueshme e jetesës, vjedhja e parase  dhe pasurisë publike, plaçkitja e pronës private  dhe dhunimit të komuniteteve rreth tyre si Rjoll, Dukat, Thell, e plot të tjera).

Nga ky shpërthim zemërate, njërezit, krejt natyrshëm, kërkojnë dorëheqjen e Edi Ramës. Çdo ditë e tij në pushtet është fatkeqsi dhe rrezik kombëtar.

Një grup nismëtar, i përbërë nga aktivistë atdhetarë, të rinj e të reja vullnetarë jo partiakë, kanë mbajtur barrën logjistike këto ditë.

Cfarë kërkon populli nga kjo protestë në vija të përgjithme.

1. Kryetarë partish, deputetë, politikanë, banditë mafiozë, ekstremistë të dhunshëm ti qëndrojnë larg mikrofonit. Por nga ana tjetër, sheshi është i mirëpritur për të gjithe, pa dallim bindje politike, fetare, krahine, ideje. Sheshi u përket qytetarëve.
2. Tek mikrofoni të flasin qytetarë të thjeshtë, të rinj e të reja, përfaqësues nga grupe sociale, nga dispora etj, figura publike nga shkenca, arti dhe kultura, sportet, publicistika media etj. ( për ekonomi kohe, të flasin jo më shumë se 2-3 minuta).
3. Dorëheqjen e Edi Ramës dhe shporrjen një herë e mirë nga skena politike të dyshes Rama& Berisha, shkaktarët kryesorë të tensionit dhe konfliktit shoqëror në Shqipëri.
4. Krijimin e një qeverie kujdestare me tipare të forta atdhetare dhe anti mafia, deri në realizimin në një kohë të përshtatshme të zgjedhjeve të lira e të barabarta me nje kod të reformuar zgjedhor. Pastaj secili në kutinë e votimit të votojë partinë që i do qejfi.

Rëndësi të kuptohet që tek kjo protestë të parët vijnë qytetarët pastaj partitë.

Ftohen qytetarët, intelektualët, artistët, sindikatat, grupet e interesit të bëjnë betejën e tyre, të shtohen dhe të japin një kontribut në largimin e menjëhershëm të Edi Ramës. Kjo revoltë popullore është pa kthim mbrapa, është betejë ekzistenciale për Shqipërinë.

Top Channel