Kryeministri izraelit Benjamin Netanyahu shtrohet në spital në Jerusalem, zyra e shtypit zbulon arsyen e vizitës 25/05 23:00
Një goditje e re e autoriteteve kineze ndaj tregtisë ndërkufitare të aksioneve ka shkaktuar tronditje në tregjet financiare dhe humbje të mëdha për kompanitë e ndërmjetësimit online.
Mes më të prekurve është edhe themeluesi i platformës kineze Futu Holdings, Liv Li, i cili humbi më shumë se një të katërtën e pasurisë së tij brenda një dite të vetme.
Autoritetet kineze po forcojnë kontrollet mbi daljen e kapitalit jashtë vendit, në një përpjekje për të frenuar investimet e pakontrolluara në tregjet e huaja dhe për të orientuar kursimet e qytetarëve drejt ekonomisë vendase. Aktualisht, Kina vendos kufizime shumë të forta mbi transferimet financiare, duke lejuar që një qytetar të dërgojë jashtë vendit jo më shumë se 50 mijë dollarë në vit dhe vetëm në kushte të caktuara.
Rregullatori kinez i letrave me vlerë njoftoi se planifikon të ndëshkojë kompanitë Futu Holdings, Tiger Brokers dhe Longbridge Securities për operim pa licencë në Kinën kontinentale. Sipas njoftimeve, Futu mund të përballet me gjoba që arrijnë rreth 271 milionë dollarë, ndërsa kompania mëmë e Tiger Brokers, Up Fintech Holding, rrezikon penalitete dhe konfiskime të ardhurash me vlerë rreth 60 milionë dollarë.
Sipas vlerësimeve të CITIC Securities, masat e reja mund të prekin deri në 32 miliardë dollarë asete të lidhura me tregtinë ndërkufitare në Hong Kong, ku pjesa më e madhe lidhet me Futu.
Lëvizja e Pekinit shkaktoi reagim të menjëhershëm në tregje. Indeksi Nasdaq Golden Dragon China Index ra me 2.2%, ndërsa kapitalizimi i tregut të Futu pësoi humbje të konsiderueshme. Sipas të dhënave të përpiluara nga Bloomberg, vetëm gjatë vitit të kaluar nga Kina dolën afro 1 trilion dollarë “para të nxehta”, niveli më i lartë që nga viti 2006.
Ndërkohë, shumë investitorë kinezë po kërkojnë mënyra alternative për të investuar jashtë vendit, pasi autoritetet po mbyllin gradualisht boshllëqet ligjore që lejonin tregtimin e aksioneve të huaja. Një prej tyre, Richard Wang, punonjës në sektorin e inteligjencës artificiale në SHBA, deklaroi për Bloomberg se kishte vendosur të shiste aksionet amerikane nga frika e kufizimeve të reja.
Autoritetet kineze deklarojnë se masat synojnë “pastrimin” e tregut të kapitalit dhe orientimin e investimeve drejt kanaleve të rregulluara zyrtarisht, si programet institucionale dhe mekanizmat e lidhur me Bursën e Hong Kongut. Në të njëjtën kohë, Pekini po rrit presionin fiskal ndaj qytetarëve që kanë të ardhura nga investimet jashtë vendit, në një përpjekje për të përballuar rënien e të ardhurave dhe rritjen e borxhit lokal.
Top Channel
