Në nëntor të vitit 2025 u inaugurua në Shqipëri fondacioni “Anakin Pet Rescue”, një nismë e re e dedikuar mbrojtjes së të drejtave të kafshëve, e cila në një kohë të shkurtër ka arritur të tërheqë vëmendjen e publikut dhe institucioneve brenda dhe jashtë vendit.
Pas këtij projekti qëndron çifti zvicerano-shqiptar, Matteo Casanova dhe Paola Sula, të cilët kanë vendosur të ndërtojnë në Shqipëri një model të ri ndërgjegjësimi dhe përkujdesjeje ndaj kafshëve.
Matteo Casanova, biznesmen zviceran, ka zgjedhur të jetojë në Shqipëri, vendin e origjinës së bashkëshortes së tij, duke investuar kohë dhe përkushtim në këtë mision humanitar. Ndërsa Paola Sula, e njohur edhe për prejardhjen nga familja e Dashnor Sula, po spikat gjithnjë e më shumë si një zë aktiv në mbrojtje të kafshëve.
Pavarësisht mundësive për të jetuar në Zvicër, çifti ka zgjedhur të kontribuojë drejtpërdrejt në Shqipëri për të sjellë ndryshim konkret në mënyrën se si trajtohen kafshët dhe për të promovuar një kulturë më humane në shoqëri.
Prej muajsh, Anakin Pet Rescue ka zhvilluar fushata sensibilizuese dhe programe edukimi për fëmijët në kopshte dhe shkolla, me fokus respektin, kujdesin dhe përgjegjësinë ndaj kafshëve. Në këtë mision, fondacioni bashkëpunon me trajnerët e specializuar të Canfel, duke sjellë një qasje moderne edukative për brezat e rinj.
Një tjetër aktivitet i rëndësishëm u zhvillua sot në strehëzën e Bashkia e Tiranës, ku fondacioni organizoi një event në bashkëpunim me Agjencia e Mbrojtjes së Konsumatorit dhe studentët e veterinarisë të shkollës profesionale Mihal Shahini.
Në aktivitet morën pjesë studentë, veterinerë, trajnerë të Canfel, si dhe klinika veterinare Aristopets, e cila ka sjellë në Shqipëri ekskluzivitetin e brandit gjerman Josera. Gjatë eventit, Josera dhuroi një sasi të konsiderueshme ushqimi për qenushët e strehëzës, një ndihmë konkrete për kafshët në nevojë.
Ky bashkëpunim mes fondacioneve, institucioneve dhe profesionistëve po konsiderohet si një model pozitiv për ndërtimin e një kulture më europiane dhe më të ndërgjegjshme ndaj kafshëve në Shqipëri. Ndërsa aktiviteti i “Anakin Pet Rescue” vazhdon të zgjerohet, shumë qytetarë e shohin këtë iniciativë si fillimin e një ndryshimi të rëndësishëm në raportin e shoqërisë shqiptare me kafshët.
Top Channel
