“Topçinjtë” kanë mposhtur me rezultatin minimal 1-0 Burnley-n në transfertë, e vlefshme për javën e 37-të, një fitore me peshë të jashtëzakonshme që i mban në krye të klasifikimit, në pritje të përgjigjes nga Manchester City.
Në një sfidë delikate ku gabimi nuk ishte opsion, heroi i londinezëve ishte Kai Havertz. Gjermani gjeti rrugën e rrjetës në minutën e 37-të, duke finalizuar me saktësi një aksion që vlen sa një sezon i tërë dhe duke i dhënë tre pikë jetike të besuarve të Mikel Artetës.
Prapaskena me “Rolex-et” e Guardiolës
Ndeshja pati edhe një sfond tejet interesant që i parapriu. Trajneri i Manchester City-t, Pep Guardiola, u kishte premtuar nga një orë luksoze “Rolex” lojtarëve të Burnley-t në rast se do të arrinin t’i ndalnin pikë Arsenalit në këtë përballje. Megjithatë, as motivimi ekstra i teknikut spanjoll nuk mjaftoi për të thyer rezistencën e Arsenalit, të cilët mbetën të fokusuar te fitorja.
Situata e Armando Brojës
Një detaj i rëndësishëm i kësaj sfide, veçanërisht për tifozët shqiptarë, ishte situata e Armando Brojës. Sulmuesi i Kombëtares jo vetëm që nuk luajti, por nuk ishte as i grumbulluar në stol për këtë përballje vendimtare të Burnley-t. Një tjetër sinjal aspak pozitiv ky për minutazhin dhe hapësirat e sulmuesit shqiptar në këtë fund sezoni.
Kombinimet e Titullit: Çfarë ndodh nëse City humbet?
Me këtë fitore, presioni kalon i gjithi mbi supet e Manchester City-t, që zbret në fushë nesër për të luajtur takimin e tij të javës së 37-të. Aktualisht, Arsenali vazhdon të mbajë kreun e tabelës.
Kombinimet janë të qarta:
Nëse Manchester City fiton nesër ndaj Bournemouth, ata rimarrin ritmin dhe vazhdojnë me presionin e plotë për javën e fundit (javën e 38-të).
Por, nëse skuadra e Guardiolës bën një hap fals (barazim ose humbje), fati i titullit kalon plotësisht në duart e Arsenalit. Një humbje e City-t nesër do t’i jepte Arsenalit shansin e artë që me një barazim ose fitore në javën e fundit të shpallej matematikisht kampion i Anglisë, pavarësisht çfarë bën City në sfidën e tyre të fundit. E gjithë vëmendja tashmë është te sfida e nesërme e Manchester City-t ndaj Bournemouth, për të kuptuar nëse ky sezon dramatik i Premier League do të na dhurojë një tjetër kthesë të papritur.
Top Channel
