Ishin pjesë e anijes ku shpërtheu hantavirusi, Holanda rikthen menjëherë katër australianë në vendin e tyre 14/05 09:35
Një nga pyetjet kryesore që dominon samitin mes SHBA-së dhe Kinës është nëse presidenti amerikan Donald Trump mund ta bindë homologun kinez Xi Jinping të ushtrojë ndikim mbi Teheranin për t’i dhënë fund përplasjes me Uashingtonin.
Në teori, Kina duket se ka profilin e duhur për të luajtur rolin e ndërmjetëses. Pekini kërkon prej kohësh të paraqitet si një fuqi diplomatike globale dhe ka marrëdhënie të forta me Iranin.
Në vitin 2023, Kina ndërmjetësoi afrimin historik mes Iranit dhe Arabisë Saudite, ndërsa javën e kaluar priti në Pekin ministrin e Jashtëm iranian, Abbas Aragchi, për bisedime diplomatike.
Pekini ruan gjithashtu komunikim të ngushtë me Pakistanin, vend që ka pritur më herët negociata mes SHBA-së dhe Iranit.
Një tjetër element kyç është ndikimi ekonomik i Kinës ndaj Teheranit. Pekini blen mbi 90% të eksporteve të naftës iraniane, duke u konsideruar si një nga mbështetësit ekonomikë më të rëndësishëm të Republikës Islamike.
Nga ana tjetër, Kina ka interesat e saj për të shmangur përshkallëzimin e konfliktit. Një luftë e zgjatur në Lindjen e Mesme mund të ndikojë negativisht ekonominë kineze, e cila mbështetet te eksportet dhe stabiliteti i tregjeve globale. Gjithashtu, Pekini përballet me presion nga SHBA-të për shkak të importeve të naftës iraniane.
Megjithatë, analistët besojnë se Xi Jinping do të tregojë kujdes ndaj kërkesave të administratës Trump.
Kina dëshiron të projektojë imazhin e një fuqie të pavarur globale dhe jo të shihet si një vend që zbaton politikat amerikane. Për më tepër, Irani mbetet një partner strategjik i Pekinit në organizata ndërkombëtare si BRICS.
Për këtë arsye, Xi pritet të vazhdojë të mbështesë zgjidhjet diplomatike dhe të bëjë thirrje për ruajtjen e stabilitetit në rajon, përfshirë mbajtjen e hapur të Ngushticës së Hormuzit, pa kompromentuar marrëdhëniet e Kinës me Teheranin dhe aleatët e saj.
Top Channel
