U konstatua helm për minj në ushqimin për fëmijë HiPP, arrestohet një person në Austri, dyshohet se e hodhi qëllimisht 02/05 22:16
Një i dënuar me vdekje, James Broadnax, është ekzekutuar me injeksion vdekjeprurës në një burg në Texas, pasi ishte shpallur fajtor për vrasje të dyfishtë në 2008, teksa bashkëshortja e tij me origjinë nga Kosova ka ndjekur nga afër procesin.
Ekzekutimi u zhvillua në prani të bashkëshortes së tij, Tiana Krasniqi, e cila ndoqi procesin nga dhoma e dëshmitarëve dhe shpërtheu në lot, duke i thirrur “Të dua” në momentet e fundit të jetës së tij.
Broadnax, 37 vjeç, ishte dënuar për vrasjen e dy producentëve të muzikës kristiane në Dallas. Sipas raportimeve mediatike, ai u shpall fajtor për vrasjen e Stephen Swan dhe Matthew Butler.
Pas ekzekutimit, Krasniqi reagoi publikisht duke kritikuar autoritetet amerikane dhe duke vënë në pikëpyetje mënyrën e zbatimit të dënimit.
Sipas saj, partneri “vuajti shumë nga injeksioni vdekjeprurës”, duke përmendur se kishte shenja gjaku dhe mavijosje, ndërsa shtroi pyetjen: “A është kjo drejtësi?”
Çifti ishte martuar vetëm pak ditë para ekzekutimit brenda burgut Allan B. Polunsky Unit, pasi ishin njohur në vitin 2024 përmes korrespondencës.
Krasniqi, e cila studion për të Drejtat Ndërkombëtare të Njeriut në Londër, kishte qenë e angazhuar në studimin e pabarazive në sistemin e drejtësisë amerikane.
Ndërkohë, edhe pse një i afërm i Broadnax kishte marrë përgjegjësinë për krimin në një fazë të mëvonshme, autoritetet nuk e konsideruan këtë dëshmi të mjaftueshme për të ndalur ekzekutimin.
Rasti ka rikthyer debatin mbi dënimin me vdekje në SHBA, veçanërisht mbi etikën dhe mënyrën e zbatimit të tij, një çështje që vazhdon të polarizojë opinionin publik.
Top Channel
