Kategoria Superiore vazhdon të dhurojë surpriza në këto javë të mbetura të sezonit të rregullt. Java e 34 e zhvilluar e gjitha këtë të shtunë me ndeshjet që u luajtën në të njëjtën orë regjistroi rezultate vërtet të habitshme ku sërish ato që vunë diktatin e tyre ishin skuadrat që luftojnë për mbijetesë
Kështu në Arenën e Demave, Partizani që synon zonën e Final Four u turpërua nga Flamurtari i vendit të fundit 1-4 dhe mbetet në vendin e pestë duke parë Dinamon që t’i shkëputet në vendin e katërt pas fitores që skuadra e Ilir Dajës mori ndaj Egnatias, një prej skuadrave që e kanë prerë tashmë biletën për në këtë fazë.
Kreu i klasifikimit nuk ndryshon, pasi si Vllaznia ashtu edhe Elbasani, dy skuadrat e tjera që janë tashmë të kualifikuara për në ‘Final Four’ i humbën ndeshjet e tyre respektive. Skuadra shkodrane humbi në Loro Boriçi të Shkodrës me rezultatin 2-0 dhe mbetet me 60 pikë në vendin e dytë, 2 më pak se Elbasani që nga ana e tij humbi në fushën e Vorës 4-2.
Lufta për mbijetesë është ajo që ndizet gjithnjë e më shumë pasi tani përfshihet edhe Teuta. Skuadra durrsake u mund nga Tirana 1-0 dhe mbetet në vendin e 6, por Djemtë e Detit janë me 38 pikë ashtu sikurse edhe pikërisht Tirana, Vora e Bylis pas fitoreve të tyre, ndërkohë që ka shanset e tij edhe Flamurtari që edhe pse është në vendin e fundit është vetëm 3 pikë pas 4 skuadrave të mësipërme.
Top Channel
