Dramë në “Benito Villamarin”, Betis-i ndal Realin në shtesë, “asist” titulli për Barcelonën

Ndonëse skuadra e Arbeloas e pati fitoren në xhep për pothuajse gjithë takimin, një gol në frymën e fundit nga Hector Bellerin ka përmbysur të gjithë skenarin, duke ndryshuar tërësisht ekuilibrat e garës në krye të tabelës.

Takimi nisi në mënyrën ideale për “Los Blancos”. Që në minutën e 17-të, ishte braziliani Vinicius Jr. ai që zhbllokoi shifrat, duke treguar sërish formën e tij fantastike dhe duke e dërguar topin në rrjetë pas një aksioni të shpejtë. Ky gol solli qetësi në radhët e madrilenëve, të cilët menaxhuan lojën dhe u përpoqën të administronin me cinizëm avantazhin minimal. Me këtë rezultat të përkohshëm, Reali po i bënte një presion direkt Barcelonës kryesuese, duke ngushtuar diferencën e pikëve pikërisht në ndeshjen hapëse të kësaj jave.

Por futbolli e rezervon shpesh dramën për sekondat e fundit. Kur dukej se gjithçka po shkonte sipas planit dhe madrilenët po bëheshin gati të arkivonin tri pikë thelbësore nga Andaluzia, vendasit gjetën forcën për t’u rikthyer. Në minutat e kohës shtesë, ishte pikërisht ish-lojtari i akademisë së Barcelonës, Hector Bellerin, ai që gjeti rrugën e rrjetës. Goli i tij shokoi prapavijën e Realit dhe u ngriu buzëqeshjen miqve në momentin më të gabuar të mundshëm, duke vulosur shifrat përfundimtare në 1-1.

Ky barazim in extremis ngjan si një dhuratë e vërtetë, ose më saktë një “asist” perfekt për Barcelonën. Duke qenë se katalanasit kanë ende për të zhvilluar ndeshjen e tyre për këtë javë, ata kanë tani shansin e artë që me një fitore të thellojnë edhe më shumë hendekun në krye të renditjes. Me vetëm pak javë të mbetura nga fundi i kampionatit, ky hap i gabuar i Real Madridit duket si goditja deçizive që i jep fund shpresave të tyre për trofeun, duke e lënë fatin e La Ligas pothuajse plotësisht në duart e rivalëve historikë.

Top Channel