West Ham United mori një barazim shumë të rëndësishëm 1-1 ndaj Manchester City-t, duke u dhënë një goditje të fortë ambicieve të kampionëve për titull në Premier League.
“Çekanët” arritën të rikuperonin disavantazhin dhe njëkohësisht i dhanë fund serisë prej shtatë humbjesh radhazi në përballjet direkte me City-n. Edhe pse trajneri Pep Guardiola ishte në tribunë për shkak të një pezullimi, skuadra e tij e nisi ndeshjen duke kontrolluar plotësisht topin dhe ritmin e lojës. Megjithatë, mbrojtja e fortë e londinezëve nuk lejoi shumë raste të pastra për gol.
Goli i parë i takimit erdhi në minutën e 31-të. Pas një pasimi nga Omar Marmoush, portugezi Bernardo Silva realizoi me klas, duke dërguar topin mbi portierin dhe në rrjetë për 0-1.
Reagimi i West Hamit ishte i menjëhershëm. Vetëm katër minuta më vonë, pas një goditjeje nga këndi të ekzekutuar nga Jarrod Bowen, qendërmbrojtësi grek Konstantinos Mavropanos u ngrit më lart se të gjithë dhe me një goditje të fuqishme me kokë barazoi shifrat në 1-1.
Në pjesën e dytë, Manchester City shtoi presionin në kërkim të golit të fitores. Raste të mira patën Erling Haaland, Jérémy Doku dhe Rayan Cherki, por portieri Mads Hermansen bëri disa pritje vendimtare për të mbajtur rezultatin në barazim. Edhe Tijjani Reijnders iu afrua golit me një goditje dënimi, por topi u devijua në traversë.
Në fund, hero për vendasit ishte sërish Mavropanos, i cili bllokoi disa tentativa të rrezikshme, duke kurorëzuar një paraqitje shumë të mirë në mbrojtje.
Barazimi i dytë radhazi për Manchester City-n dëmton ambiciet për titull, pasi skuadra mbetet nëntë pikë pas Arsenalit, edhe pse me një ndeshje më pak. Ndërkohë, kjo pikë është shumë e vlefshme për West Hamin, që vazhdon luftën për mbijetesë dhe mbetet jashtë zonës së rënies nga kategoria.
Top Channel
