I riu u godit më thikë në një gjimnaz në Delvinë, deputeti Bido: Fëmijët nuk janë material për politikë, disa deputetë… 07/03 15:34
Në Ditën e Mësuesit, Presidenti i Republikës, Bajram Begaj, bëri bashkë mësues shqiptarë nga të gjitha trevat shqiptare dhe nga diaspora, në një ceremoni kushtuar kontributit të tyre për ruajtjen, përcjelljen dhe trashëgiminë e gjuhës shqipe.
Në fjalën e tij, kreu i shtetit shprehu mirënjohje për të gjithë mësuesit shqiptarë, brenda e jashtë vendit, për misionin e tyre kombëtar.
“Ju jeni ambasadorët tanë më të çmuar. Ju po parandaloni humbjen e shpirtit shqiptar në dallgët e globalizimit. Ju jeni ura që lidh brezat. Ju jeni garancia se integrimi nuk do të thotë asimilim”, u shpreh Begaj.
Presidenti Begaj vlerësoi në veçanti punën e mësuesve shqiptarë në diasporë për ruajtjen e gjuhës amtare.
“Sa herë humb një fjalë shqipe, humb edhe një pjesë e shpirtit tonë. Prandaj, puna juaj në diasporë nuk është thjesht mësimdhënie, por edhe ruajtje e lidhjes shpirtërore me kombin”, tha Presidenti.
Kreu i Shtetit vlerësoi gjithashtu mësuesit veteranë të ardhur nga Kosova për guximin dhe sakrificën e tyre përballë regjimit të Millosheviçit, kur shumë prej tyre i kthyen shtëpitë në shkolla shqipe.
“Ju dëshmuat se një populli mund t’i mbyllen shkollat, mund t’i ndalohen librat, mund t’i kufizohet liria, por kurrë nuk mund t’i ndalohet mendja, nuk i shuhet etja për dije dhe nuk i shteron vullneti për të edukuar brezin tjetër”, u shpreh ai.
Në fjalën e tij, Presidenti Begaj inkurajoi arsimtarët të përballen me sfidat e kohës, duke theksuar se arsimi cilësor mbetet një sfidë kombëtare.
“Gjuha jonë është pasuria jonë e përbashkët dhe mbrojtja e saj është një projekt kombëtar që na përfshin të gjithëve. Shteti duhet të jetë partneri juaj kryesor në këtë mision, duke siguruar që energjia juaj profesionale të ketë mbështetjen e duhur institucionale”, tha Begaj.
Në aktivitetin e zhvilluar nga Presidenti Begaj ishin mësues në pension nga e gjithë Shqipëria, mësues nga shkollat shqipe në Kosovë, Mal të Zi dhe rajon, si dhe mësues të shkollave shqipe të diasporës, të ardhur nga shtete të ndryshme të botës.
Top Channel
