Vedat Muriqi vazhdon të lërë gjurmë në kampionatin spanjoll të futbollit. Sulmuesi i Mallorcas dhe i kombëtares së Kosovës shënoi edhe në ndeshjen me Sevillan, ku mungonte Marash Kumbulla për arsye dëmtimi, për të cuar në 15 numrin e golave të shënuar në këtë sezon me fanelën e skuadrës ishullore, duke barazuar rekordin e tij personal me Mallorca në sezonin 2022/23.
Në minutën e 26, Mallorca fitoi një 11 metërsh që u akordua me sistemin VAR me piratin që iu drejtua pikës së bardhë duke e dërguar topin në rrjetë duke zhbllokuar rezultatin në këtë përballje. Muriqi pati rol edhe në golin e tretë të Mallorca teksa gjuajtja e tij u devijua në gol nga Darder që mori autorësinë e tij
Vedat Muriqi me 15 golat e tij është i vetëm në vendin e dytë në klasifikimin e golashënuesve më të mirë të La Liga teksa përpara tij është vetëm Kylian Mbappe me 22 gola, ndërsa ndjekësi më i afërt i dardanit është Ferran Torres i Barcelonës me 12 gola. Vlen të kujtohet se Vedat Muriqi u shpall edhe futbollisti më i mirë i muajit janar në kampionatin spanjoll. Përsa i përket ndeshjes, rezultati përfundimtar mbeti 4-1 për Mallorca që ngjitet në kuotën e 24 pikëve në vendin e 13, ndërkaq Vedat Muriqi u shpall edhe Lojtari më i mirë i ndeshjes.
Shiko këtu golin e Muriqit
Top Channel
