Video/ Carney i përgjigjet Trump: Kanadaja ekziston, por jo falë SHBA-së 22/01 22:43
Një burrë nga Toronto akuzohet se për vite me radhë është shtirur si pilot, duke mashtruar disa nga linjat ajrore më të mëdha amerikane dhe duke përfituar qindra fluturime falas, sipas autoriteteve në Hawaii.
Rasti ngjan me filmin e famshëm “Catch Me If You Can”, ku Leonardo DiCaprio luan rolin e mashtruesit legjendar Frank Abagnale. Autoritetet thonë se Dallas Pokornik, 33 vjeç, ka mashtruar sistemin e linjave ajrore për një periudhë rreth katërvjeçare.
Pokornik akuzohet për mashtrim, pasi dyshohet se ka mashtruar tre linja ajrore të mëdha amerikane, duke përdorur identitet të rremë profesional. Sipas hetimeve, ai kishte punuar si asistent fluturimi për një linjë ajrore me seli në Toronto nga viti 2017 deri në vitin 2019.
Pas largimit nga puna, Pokornik dyshohet se ka vazhduar të përdorë kartën e identitetit të punonjësit për të siguruar bileta falas, të cilat autoritetet thonë se ai e dinte se ishin të falsifikuara.
Në një rast, ai kërkoi edhe një vend në kabinën e pilotit, një sedilje e rezervuar zakonisht vetëm për pilotët jashtë detyrës. Sipas rregullave federale, përdorimi i këtyre sediljeve për udhëtime personale apo argëtimi është i ndaluar, ndërsa Pokornik nuk ishte pilot dhe nuk kishte licencë përkatëse.
Mbetet ende e paqartë se si ai arriti t’i bindte linjat ajrore se ishte ende punonjës aktiv, edhe pse kishte vite që kishte lënë punën. Siç raporton The Guardian, zakonisht punonjësit e linjave ajrore përdorin karta të lidhura me një bazë të dhënash që përfshin fotografinë dhe statusin e punësimit, por kontrollet janë më të lehta kur udhëtimi kryhet për qëllime personale.
Nëse shpallet fajtor, Dallas Pokornik rrezikon deri në 20 vjet burg dhe një gjobë deri në 250 mijë dollarë.
Top Channel
