Hoffenheimi ka bërë të qartë qëndrimin e tij për të ardhmen e Fisnik Asllanit, duke vendosur një çmim shumë të lartë për kartonin e sulmuesit.
Sipas burimeve pranë klubit gjerman, drejtuesit nuk kanë ndërmend të hapin negociata për një shifër më të ulët se 50 milionë euro, duke e konsideruar lojtarin si një nga asetet më të rëndësishme të projektit sportiv.
Paraqitjet e fundit të Asllanit kanë rritur ndjeshëm interesimin e disa klubeve europiane, të cilat po e ndjekin nga afër zhvillimin e tij. Me gola, lëvizje inteligjente në repartin ofensiv dhe pjekuri në lojë, 22-vjeçari ka treguar se është gati për një hap të madh në karrierë.
Te Hoffenheimi vlerësojnë jo vetëm cilësitë teknike të sulmuesit, por edhe potencialin e tij për t’u zhvilluar më tej në vitet në vazhdim. Pikërisht për këtë arsye, klubi gjerman nuk ndien presion për ta shitur dhe është i gatshëm ta mbajë në skuadër, përveç rasteve kur vjen një ofertë që i përgjigjet pritshmërive financiare.
Vendosja e një çmimi kaq të lartë shihet edhe si një mesazh i qartë për tregun: Hoffenheim nuk dëshiron ta humbasë lehtë Asllanin dhe do të pranojë vetëm oferta të jashtëzakonshme. Në javët në vijim pritet të shihet nëse ndonjë klub do të jetë gati të afrohet me këtë shifër për shërbimet e sulmuesit.
Top Channel
