Pas përfundimit të sezonit të Formula 1, Max Verstappen dhe Oscar Piastri, të cilët e humbën titullin në garën e fundit nga Lando Norris, kanë reflektuar mbi një vit të mbushur me tension, sfida dhe gara vendimtare.
Verstappen e pranoi se humbja nuk ishte e lehtë, por theksoi se ndihet krenar për reagimin e skuadrës: “Humbëm, është e vështirë ta pranosh, por kështu është. Jam shumë krenar dhe i lumtur me mënyrën se si reagoi skuadra jonë ndaj një fillimi të vështirë të sezonit dhe disa momenteve shumë të vështira.”
Piloti holandez tha se, pavarësisht makinës problematike në disa gara, ai dhe ekipi i tij dhanë maksimumin: “Nuk ishte e lehtë të biesh në kaos, por arritëm të qëndronim të fortë. Nga ana ime, jam i lumtur: nuk kam keqardhje. Bëmë gjithçka që kishim në dorë, madje edhe kur makina nuk ishte aspak e këndshme për t’u drejtuar. Mos u dorëzo kurrë, beso në veten tënde deri në fund.”
Nga ana e tij, Oscar Piastri tha se provuan çdo strategji të mundshme për të luftuar për titull: “Ne morëm një rrezik strategjik për të rritur opsionet tona, duke shpresuar se planetët do të rreshtoheshin në favorin tonë, por në fund nuk ndodhi.”
Piastri pranoi se mungesa e seancës së parë të së premtes e penalizoi në ritëm, por u shpreh i kënaqur me performancën e tij: “Mendoj se bëra më të mirën time. Nuk kishim ritmin e Verstappen.”
Ai vlerësoi rivalin e tij të drejtpërdrejtë në ekip, Lando Norris: “Lando e meritonte titullin. Gjatë tre viteve të fundit e kemi shtyrë njëri-tjetrin për t’u bërë më të mirë. Këtë vit ka qenë një sfidë e madhe mes nesh.”
Piastri shtoi se, pavarësisht ulje-ngritjeve, të tre pilotët kryesorë të sezonit dhanë një nivel të jashtëzakonshëm gare: “Lando ishte i shkëlqyer, por në fund të fundit, të tre ishim të shkëlqyer.”
Top Channel
