Oscar Piastri dominoi Sprint-in e Çmimit të Madh të Katarit dhe ngushtoi diferencën me liderin e kampionatit, Lando Norris, në vetëm 22 pikë.
Piloti australian, që nisi nga pole, udhëhoqi pa asnjë moment presioni 19 xhirot e Sprint-it, duke lënë pas George Russell. Ndërkohë, Norris arriti të frenojë sulmin e hershëm të Max Verstappen, i cili u ngjit shpejt nga vendi i gjashtë, por në fund humbi terren dhe tashmë është 25 pikë pas britanikut, me vetëm dy gara të mbetura: garën e së dielës në Katar dhe finalen në Abu Dhabi më 7 dhjetor.
Me rezultatin e Sprint-it, llogaritë janë të qarta: Norris shpallet kampion bote nëse mban të paktën 26 pikë epërsi ndaj Piastrit dhe Verstappen pas garës së së dielës. Skenari më i thjeshtë për të mbyllur titullin: një fitore ose një vend i dytë, me kusht që Verstappen të përfundojë pas tij dhe Piastri të mos jetë në podium.
Nga ana tjetër, Piastri dhe Verstappen duhet të qëndrojnë brenda 25 pikëve nga Norris për të mbajtur gjallë shpresat për titullin para finales në Abu Dhabi.
“Për momentin gjithçka ka ecur perfekt. Sprint-i ishte i qetë dhe pa surpriza, kështu që jam i kënaqur me ritmin dhe performancën,” deklaroi Piastri pas garës.
Në pjesën tjetër të renditjes, Yuki Tsunoda shënoi rezultatin e tij më të mirë sezonal me Red Bull duke u renditur i pesti, pavarësisht një penalizimi prej pesë sekondash për tejkalim të limiteve të pistës. Kimi Antonelli realizoi të vetmin parakalim në Top 10 dhe u klasifikua i shtati, edhe ai i penalizuar për të njëjtin shkelje.
Fernando Alonso (Aston Martin) u rendit i shtati në garën zyrtare, ndërsa Carlos Sainz (Williams) mori pikën e fundit në vendin e tetë.
Ferrari pati një Sprint të vështirë: Charles Leclerc përfundoi i 13-ti, ndërsa Lewis Hamilton u shpreh i zhgënjyer duke thënë “Nuk e di si e bëmë makinën më të keqe”, teksa u klasifikua vetëm i 17-ti pas nisjes nga pit-lane.
Top Channel
