Ric Flair ka ngritur akuza të rënda mbi rrethanat e vdekjes së ikonës së WWE, Hulk Hogan, i cili ndërroi jetë në korrik në moshën 71-vjeçare.
Vdekja e Hogan – emri i vërtetë i të cilit ishte Terry Gene Bollea – shkaktoi reagime të shumta nga fansat e mundjes. Legjenda amerikane pësoi një atak kardiak dhe u rrëzua në shtëpinë e tij në Florida, teksa po kryente terapi pas një qëndrimi të gjatë në spital. Dy muaj para vdekjes, gjatë një operacioni, atij i ishte dëmtuar nervi frenik, çka sipas miqve të tij solli një përkeqësim të shpejtë të gjendjes shëndetësore.
Por Ric Flair, dy herë pjesë e WWE Hall of Fame, ka bërë deklarata të forta mbi shkaqet që sipas tij e çuan Hogan drejt fundit.
Në një intervistë në podcast-in Double Coverage, 76-vjeçari tha se Hogan po përdorte medikamente të pashkruara nga mjeku për të përballuar dhimbjet e forta të trupit.
“Fola me të një ditë para se të vdiste. Nuk duhet ta them këtë, por atë e vranë drogat e rrugës,” u shpreh Flair. “Kur mjeku nuk pranonte t’i jepte më ilaçe – sepse ishte në shumë dhimbje – ai kishte bërë edhe një operacion në qafë dhe ishte infektuar. Pas kaq shumë operacioneve, shpinë, gjunjë, ije… Kur doktorët nuk mund t’i jepnin më qetësues, ai i siguroi nga rruga. Trupi i tij thjesht u dorëzua.”
Karriera 50-vjeçare e Flair ka qenë po aq e dhimbshme sa ajo e Hogan. Ai ka thyer shpinën në një aksident avioni në vitin 1976 dhe ka pësuar dëmtime të rënda në ring, përfshirë thyerjen e dy rruazave gjatë një ndeshjeje me Dusty Rhodes. Më herët këtë vit, Flair njoftoi se ishte shëruar nga melanoma pas trajtimeve të gjata.
Megjithatë, rënia drastike e shëndetit të Hogan ka shtuar frikën e tij për të ardhmen.
“Ne të gjithë e kemi vënë veten në pozicione të tmerrshme në këtë biznes,” tha ai. “Por ja ku jam, pesë vjet më i vjetër se Hulk, dhe nuk kam dhimbje fare. Kam pasur probleme serioze shëndetësore, por nuk ndiej asnjë siklet. Kjo më shqetëson… dhe natyrisht më jep ankth se mos jam unë i radhës.”
Top Channel
