Sulmet izraelite në Gaza, shkon në 33 numri i viktimave brenda 12 orësh 20/11 23:02
Një kongresiste nga Florida është akuzuar për vjedhjen e 5 milionë dollarëve fonde federale për katastrofat natyrore.
Sheila Cherfilus-McCormick akuzohet se ka përdorur disa nga paratë e Agjencisë Federale për Menaxhimin e Emergjencave për fushatën e saj zgjedhore në vitin 2021.
Demokratja 46-vjeçare është nën hetim nga Komiteti i Etikës së Dhomës së Përfaqësuesve dhe mund të përjashtohet nga Kongresi. Prokurorja e Përgjithshme, Pam Bondi, e cilësoi këtë si “një krim veçanërisht egoist dhe cinik”.
Në një deklaratë, Cherfilus-McCormick, e zgjedhur në Kongres në 2022, mohoi çdo shkelje dhe premtoi se do të pastronte emrin e saj nga akuzat. Ajo rrezikon deri në 53 vite burg nëse shpallet fajtore.
Mashtrimi dyshohet të ketë ndodhur përmes një kompanie shëndetësore të drejtuar nga ajo dhe vëllai i saj, Edwin Cherfilus, 51 vjeç, i cili gjithashtu akuzohet. Sheila ishte CEO e firmës, Trinity Healthcare Services, në atë kohë.
Kompania kishte fituar një kontratë me agjencinë për regjistrimin e qytetarëve për vaksinat Covid, por në korrik 2021 mori një pagesë të tepërt prej 5 milionë dollarësh nga fondet federale, sipas Departamentit të Drejtësisë. Motër e vëlla dyshohet se tentuan të fshehin burimin e parave duke i kaluar ato përmes disa llogarive dhe më pas përdorën “një pjesë të konsiderueshme” për fushatën kongresuale të Sheila-s.
Prokurorët thonë se Cherfilus-McCormick dhe një person tjetër i përmendur në aktakuzë, dyshohet se kanë devijuar fondet nga kontrata FEMA tek miq dhe familjarë, të cilët më pas i dhuruan ato sërish si kontribute personale për fushatën e saj.
“Nuk ka njeri mbi ligjin, veçanërisht njerëz të fuqishëm që plaçkitin taksapaguesit për përfitim personal,” tha Prokurorja e Përgjithshme. “Do të ndjekim faktet dhe do të sjellim drejtësinë.”
Një jurie federale në Miami miratoi aktakuzën të mërkurën. Sheila Cherfilus-McCormick e cilësoi aktakuzën si “të padrejtë, të pabazuar dhe mashtruese” dhe mohoi çdo faj. “Jam thellësisht mirënjohëse për mbështetjen e distriktit tim dhe jam e bindur që e vërteta do të dalë në shesh”-tha ajo.
Top Channel
