Uellsiani 42-vjeçar nënshkroi një kontratë 3.5-vjeçare me Wolves, duke u larguar nga Middlesbrough, dhe po merr përsipër përpjekjen titanike për të evituar rënien me ekipin e fundit, me vetëm dy pikë në 11 ndeshje.
Rob Edwards është njeriu që do të marrë përsipër detyrën e vështirë për të mbajtur Wolves në Premier League. “Ujqërit” kanë arritur një marrëveshje me Middlesbrough, ku trajneri 42-vjeçar ka punuar deri më tani, dhe kanë njoftuar nënshkrimin e një kontrate 3.5-vjeçare me të.
Ish-lojtari i kombëtares së Uellsit ka veshur fanellën e Wanderers për katër vjet (2004-2008), me të cilët madje filloi karrierën e tij si trajner në vitin 2016, duke shërbyer si trajner i përkohshëm i ekipit për dy ndeshje. Më pas ai punoi në ekipe më të vogla (Telford, Forest Green, Watford, Luton dhe Middlesbrough), ndërsa ka qenë edhe në stolin e ekipit kombëtar të Anglisë U16.
Edwards zëvendëson Vitor Pereiran në stolin e Wolves dhe misioni i tij duket vërtet i pamundur, pasi “ujqërit” kanë vetëm dy pikë pas njëmbëdhjetë ndeshjeve të ligës dhe janë “të bllokuar” në vendin e fundit, shtatë pikë pas Nottingham Forest të parafundit.
Rekrutimi i uellsianit, megjithatë, ka një karakter afatgjatë (siç tregohet nga kohëzgjatja e kontratës së tij), diçka që kryetari i klubit, Geoff Shea, e theksoi: “Ne duhet ta rinovojmë klubin me një filozofi të re stërvitjeje, me identitetin dhe idetë e veta, dhe ta “ndërtojmë” mbi këtë. Jemi në një kapitull të ri për klubin dhe Rob do të jetë një pjesë “kyçe” në të.”
Top Channel
