Pesë të dyshuar të rinj u arrestuan të enjten në lidhje me vjedhjen në Muzeun e Luvrit.
Sipas Franceinfo, katër prej tyre ishin duke shkuar në stadiumin Jean-Bouin për ndeshjen e Ligue 1 midis Paris FC dhe Olympique Lyonnais kur u arrestuan. Ndërsa Paris FC bëri një rikthim të pabesueshëm për të marrë një barazim kundër Lyon në Ligue 1 (3-3), ndeshja ‘u prish’ nga një ngjarje e papritur pranë Stade Jean-Bouin.
Katër “tifozë” që po hynin në stadiumin parizien u ndaluan nga policia. Sipas Franceinfo, katër burrat dyshohen për përfshirje në grabitjen e Muzeut të Luvrit dhe janë marrë në paraburgim. Një burrë i pestë thuhet se u arrestua në La Courneuve.
Prokurori i Parisit i justifikoi arrestimet në RTL: “Njëri prej tyre ishte me të vërtetë një objektiv i hetuesve, pasi kishim prova të ADN-së që lidheshin me të. […] Sa i përket personave të tjerë që u morën në paraburgim, ata janë njerëz që mund të jenë në gjendje të na japin informacion se si u zhvilluan këto ngjarje.”
Një nga të dyshuarit besohet të jetë shoferi i njërit prej skuterave që i lejoi hajdutët të iknin, përpara se të kapej në autostradën A6. Si kujtesë, më 19 tetor, katër burra arritën të hynin me forcë në Galerinë Apollo të Muzeut të Luvrit dhe vodhën disa bizhuteri dhe xhevahire të Kurorës për një shumë të vlerësuar në 88 milionë euro.
Top Channel
