Rritet bilanci i viktimave në tragjedinë e mitingut të djeshëm në Indi, 39 persona humbën jetën, prej tyre 9 fëmijë 28/09 11:23
Gjendja fizike e presidentit rus Vladimir Putin mbetet një nga misteret më të mëdha të politikës globale.
Thashethemet për probleme serioze shëndetësore janë rikthyer fuqishëm në vëmendjen ndërkombëtare, sidomos pas paraqitjes së tij të fundit në paradën ushtarake të 3 shtatorit në Pekin, ku u raportua se ai dukej i dobësuar dhe i mbështetur nga ndihmësit e tij gjatë ecjes.
Kanceri: Hije të vjetra që rikthehen
Spekulimet për kancerin e tiroides janë të pranishme që prej vitit 2022, kur media e pavarur ruse Proekt publikoi një raport të detajuar mbi praninë e përhershme të mjekëve të specializuar, përfshirë një onkolog, gjatë udhëtimeve të Putinit. Regjistrat zyrtarë të fluturimeve treguan dhjetëra vizita mjekësore mes viteve 2017–2021, që nxitën dyshimet për një trajtim afatgjatë.
Në të njëjtin vit, Newsweek raportoi se Putin kishte kaluar një operacion për të hequr një tumor të avancuar, pretendim që më vonë u mohua kategorikisht nga Ministri i Jashtëm rus, Sergei Lavrov.
Parkinsoni dhe detajet që nxisin dyshime
Në nëntor të vitit të kaluar, një video virale e tregoi presidentin rus teksa përpiqej të mbante duart e palëvizura, duke shkaktuar spekulime për sëmundjen e Parkinsonit. Komentet u përforcuan nga zyrtari ukrainas Anton Gerashenko, ndërsa Kremlini, si zakonisht, e quajti situatën si pjesë të “kontrolleve rutinë”.
Në një tjetër video në janar, Putin shihet duke lexuar me shkronja të jashtëzakonshme të mëdha, një detaj që ringjalli diskutimet për probleme me shikimin. Më pas, ai vetë pranoi një “rënie të lehtë” të shikimit, duke thënë se nuk kishte më “10/10” por “9 ose 8”.
Pekini dhe lodhja e dukshme: Putin mbështetet për të ecur
Zërat për gjendjen e rënduar fizike u shtuan pas paradës ushtarake të mbajtur në Pekin më 3 shtator. Ish-kryeministri italian Massimo D’Alema, i pranishëm në ngjarje, tha për Corriere della Sera se Putin “dukej shumë i lodhur” dhe se “u mbështet nga dy persona” gjatë ecjes.
Po në këtë vizitë, gjatë një bisede me presidentin kinez Xi Jinping, Putin foli për bioteknologjinë dhe jetëgjatësinë, duke pretenduar se njerëzit së shpejti mund të jetojnë deri në 150 vjet – një koment që shumë e kanë interpretuar si një shenjë obsesioni me vdekshmërinë personale.
Spekulime për sozitë dhe fundin e afërt
Hipotezat për përdorimin e sozive nuk janë të reja, por janë forcuar së fundmi. Presidenti ukrainas Volodymyr Zelensky ka deklaruar më herët se “Putini do të vdesë së shpejti dhe kjo luftë do të marrë fund”, duke ushqyer teoritë e një fundi të afërt të liderit rus.
Ndërsa Kremlini vazhdon të mohojë çdo problem shëndetësor, mungesa e transparencës dhe shfaqjet e kontrolluara të presidentit rus vetëm sa e ushqejnë më shumë aurën e misterit, që rrethon një nga figurat më të izoluara dhe më të pushtetshme në botë.
Top Channel
