Situatë e paqartë në Britani, evakuohet aeroporti Heathrow 08/09 23:00
Ushtria izraelite ka shpallur një tjetër “zonë humanitare” në jug të Rripit të Gazës, në një pjesë të vogël të Al-Mawasi, pranë Khan Younis, duke urdhëruar civilët palestinezë që të evakuohen atje “për sigurinë e tyre”.
Ky është përcaktimi i parë zyrtar i një zone të tillë nga Forcat Mbrojtëse të Izraelit (IDF) që prej marsit, kur luftimet rifilluan pas një armëpushimi dymujor me Hamasin.
Në një deklaratë të publikuar të shtunën në mëngjes, IDF tha se “Për sigurinë tuaj, ju kërkohet të evakuoni menjëherë ndërtesën dhe tendat ngjitur në drejtim të jugut, drejt zonës humanitare në Mawasi Khan Younis.”
Zona e re, me një sipërfaqe më të vogël se 43 kilometra katrorë, përfaqëson vetëm rreth 12% të territorit të Gazës. Megjithatë, sipas raportimeve ndërkombëtare, Al-Mawasi është tashmë e tejmbushur me banorë të zhvendosur nga pjesë të tjera të Gazës.
Gjatë fazave të mëparshme të konfliktit, IDF-ja ka përdorur të njëjtën terminologji për të justifikuar zhvendosjen e civilëve drejt zonave që më pas janë goditur nga sulmet ajrore. Një hetim i BBC Verify më herët këtë vit zbuloi se të ashtuquajturat zona të sigurta janë shënjestruar mbi 100 herë nga forcat izraelite.
Organizatat ndërkombëtare humanitare dhe OKB nuk i njohin këto zona si “humanitare” dhe kanë kritikuar rëndë përdorimin e këtij termi nga Izraeli, duke e konsideruar të rrezikshëm dhe të paqëndrueshëm për civilët.
Në Gazë, ku popullsia arrin në rreth 2.1 milion banorë, situata humanitare vazhdon të përkeqësohet mes bombardimeve intensive, mungesës së ushqimit, ujit të pijshëm dhe ndihmës mjekësore.
Top Channel
