Netanyahu përgatit ofensivë të re në Gaza, braktis bisedimet për armëpushim dhe përballet me kundërshtime nga siguria izraelite 31/08 16:26
Hetimi mbi publikimin e imazheve të vjedhura të grave – përfshirë edhe figura publike si kryeministrja italiane Giorgia Meloni – në platforma pornografike të paligjshme si “Phica.eu”, “Phica.net”, “Comeup” dhe të tjera, ka hyrë në një fazë të re.
Sipas burimeve të Policisë Postare italiane, është identifikuar administratori i këtyre faqeve, një shtetas italian, ashtu si edhe disa nga bashkëpunëtorët e tij, pavarësisht se serverat ndodhen jashtë vendit.
Raporti i parë zyrtar pritet t’i dorëzohet Prokurorisë së Romës, ndërsa hetime të ngjashme janë duke u zhvilluar paralelisht edhe në qytete të tjera të Italisë, pas ankesave të paraqitura nga viktimat – shumica gra, disa prej tyre zyrtare të shtetit.
Nga shpifje te nxitje për dhunë: Hetuesit po shqyrtojnë akuza të rënda
Hetimi po zgjerohet jo vetëm ndaj atyre që menaxhojnë këto platforma, por edhe ndaj përdoruesve që kanë komentuar në mënyrë ofenduese apo kërcënuese nën fotot e publikuara. Shumë prej tyre janë tashmë të identifikuar dhe rrezikojnë akuza për shpifje të rënduar, dhunë private, nxitje për krim dhe përbuzje të zyrtarëve shtetërorë.
Gjithashtu, hetuesit po shqyrtojnë lidhjet e mundshme mes këtyre faqeve dhe portaleve të tjera në rrjetin e errët, të cilat dyshohet se përmbajnë materiale edhe më të rënda, përfshirë imazhe të vajzave të mitura.
Pista e rrjeteve sociale: Faqja “Mia Moglie” nën hetim
Policia ka nisur hetim edhe për një faqe në Facebook me emrin “Mia moglie”, e cila është mbyllur së fundmi. Mbyllja u parapri nga një valë raportimesh – mbi 3,000 në vetëm pak ditë – për shkelje të privatësisë dhe përmbajtje seksiste. Faqja ishte kthyer në një pikë grumbullimi për postime të ngjashme me ato në “Phica”, ku përdoreshin imazhe të grave pa pëlqimin e tyre dhe shoqëroheshin me komente denigruese.
Nis padi kolektive kundër Meta-s dhe administratorëve të faqeve
Avokatja e njohur italiane Annamaria Bernardini de Pace, në bashkëpunim me kolegun David Leggi, ka njoftuar një padi kolektive kundër rrjetit social Facebook (Meta), për dështimin në monitorimin dhe mbylljen e përmbajtjeve të paligjshme. Ajo e ka cilësuar rastin si një “shkelje të rëndë të dinjitetit femëror” dhe fton të gjitha gratë e prekura të bashkohen në këtë proces ligjor.
Po shqyrtohet gjithashtu edhe ngritja e dy padive të tjera, për shpërndarje të paligjshme të përmbajtjeve seksuale (revenge porn), ngacmim dhe dhunë online.
Gratë reagojnë vetë: Rast i veçantë në Xhenova
Ndërkohë, në disa qytete si Xhenova, vetë viktimat kanë nisur të identifikojnë publikisht përdorues që kanë postuar imazhe të grave të tyre në këto platforma, duke i ekspozuar përmes mediave sociale. Në disa raste, personat janë njohur nga komuniteti, pavarësisht përdorimit të emrave anonimë. Edhe pse shumë prej tyre janë përpjekur të fshihen dhe të largojnë gjurmët e tyre, për hetuesit duket se është tashmë tepër vonë.
Top Channel
