Analiza e CNN/ Me një ushtri të rraskapitur Izraeli fillon operacionin për pushtimin e Gazës, a është kjo lëvizje “dënim me vdekje” për pengjet izraelite?

IDF (forcat e armatosura të Izraelit) ka vendosur tashmë një prani në periferi të qytetit pas ditësh sulmesh të rënda ajrore dhe artilerie, tha dje një zëdhënës ushtarak izraelit.

Përshkallëzimi e shtyu sekretarin e përgjithshëm të OKB-së të përsëriste thirrjen e tij për një armëpushim. “Është jetike që një armëpushim në Gaza të arrihet menjëherë për të shmangur viktimat masive dhe shkatërrimin”, u tha Guterres gazetarëve në Japoni, ku po merr pjesë në një konferencë mbi zhvillimin afrikan.

Sipas një deklarate dje nga një zëdhënës i ushtrisë izraelite, trupat tashmë po veprojnë në zonat Zeitoun dhe Jabalia, duke përgatitur terrenin për ofensivën më të gjerë të miratuar të martën nga Ministri i Mbrojtjes Israel Katz dhe që pritet të diskutohet në kabinetin e sigurisë më vonë këtë javë. Rreth 60 miijë rezervistë u thirrën për t’u bashkuar me forcat IDF në fillim të shtatorit.

Kryeministri izraelit, Benjamin Netanyahu urdhëroi dje një orar më të ngushtë për kapjen e fortifikimeve të Hamasit në Rripin e Gazës dhe mposhtjen e organizatës, tha zyra e tij.

Hamasi, nga ana e tij, akuzoi udhëheqësin izraelit për vazhdimin e një “lufte brutale kundër civilëve të pafajshëm” dhe e kritikoi atë për “indiferencë” ndaj propozimit të ri të armëpushimit nga ndërmjetësit rajonalë, të cilit Izraeli ende nuk i është përgjigjur zyrtarisht.

Autoritetet izraelite pritet të urdhërojnë qindra mijëra banorë të Qytetit të Gazës të evakuojnë shtëpitë e tyre dhe të shkojnë në strehimore në pjesën jugore të enklavës, ndërsa përgatitjet për fazat e ardhshme të planit të pushtimit, të koduar ” Gideon’s Chariots II“, përparojnë.

Reagimi ndërkombëtar nuk duket se e ka penguar qeverinë e Netanyahut. Presidenti francez Emmanuel Macron paralajmëroi se operacioni “mund të çojë vetëm në katastrofë për të dy popujt dhe ta zhytë rajonin në një cikël lufte të përhershme”.

Në të njëjtën linjë, Komiteti Ndërkombëtar i Kryqit të Kuq theksoi se zhvendosjet e reja dhe përshkallëzimi i mëtejshëm “rrezikojnë të përkeqësojnë një situatë tashmë të tmerrshme” për popullsinë e Gazës prej 2.1 milionë banorësh.

Ushtria e rraskapitur izraelite mund të përballet me probleme personeli

Ministri i Mbrojtjes, Israel Katz, urdhëroi dje në mëngjes mobilizimin e 60,000 rezervistëve, si pjesë e zbatimit të fazave të ardhshme të planit për të pushtuar Gazën. Vendimi u mor gjithashtu për të zgjatur shërbimin e 20,000 rezervistëve që tashmë shërbejnë në ushtri.

Pas pothuajse dy vitesh lufte dhe në dritën e operacionit të ri të madh, zyrtarët e ushtrisë po shprehin shqetësimin e tyre për barrën shtesë mbi IDF-në. Siç thekson rrjeti amerikan CNN, disa rezervistë janë thirrur disa herë për të luftuar në Gaza që nga fillimi i konfliktit.

Shefi i Shtabit të Forcave të Armatosura, gjenerallejtënant Eyal Zamir, kishte informuar kabinetin e sigurisë në fillim të këtij muaji se ushtria po përballej me dobësim dhe rraskapitje, por shqetësimet e tij u injoruan pasi Netanyahu dhe partnerët e tij qeveritarë këmbëngulën në planet e reja të luftës.

Një sondazh i ri nga Agam Labs në Universitetin Hebraik të Jerusalemit zbuloi se rreth 40% e ushtarëve kanë humbur motivimin e tyre për të shërbyer, në dallim nga 13% që thonë se janë më të gatshëm se më parë.

Gjetjet nxjerrin në pah realitetin e ashpër brenda ushtrisë izraelite, e cila mund të përballet me probleme me personelin në kontekstin e rekrutimit të ri, pasi sondazhet tregojnë se shumica dërrmuese e qytetarëve mbështesin përfundimin e luftës.

Dënim me vdekje për pengjet

Absalom Zohar Shall ka shërbyer më shumë se 300 ditë në Gaza në katër misione të ndryshme. Misioni i tij i fundit përfundoi vetëm një muaj më parë dhe ai nuk është gati të kthehet në vijën e frontit, veçanërisht në një operacion në Qytetin e Gazës.

“Jam pak i tronditur që ende po flasim për këtë luftë, e cila supozohej të kishte mbaruar shumë kohë më parë”, tha Zohar Shall për CNN. Ai thotë se dyshimet që filluan ta kapnin një vit më parë tani janë intensifikuar dhe të tjerët në njësinë e tij po shprehin të njëjtat shqetësime.

“Unë besoj se ky vendim është i barabartë me një dënim me vdekje për pengjet. Qeveria ka thënë gjatë gjithë kohës se kjo luftë ka dy misione: Të kthejë pengjet dhe të mposhtë Hamasin. Tani është sikur po na thonë se ka vetëm një qëllim, i cili, sipas mendimit tim, nuk është i arritshëm, të shkatërrojë Hamasin. Dhe as ajo që po bëhet tani nuk do ta shkatërrojë atë”, tha ai

Mbetet e panjohur se sa rezervistë do t’i përgjigjen thirrjes së re për të shërbyer përsëri në Gaza, veçanërisht pasi shefi i ushtrisë paralajmëroi se operacioni mund të rrezikojë si ushtarët ashtu edhe pengjet. Urdhrat e marshimit janë të detyrueshëm, por deri më tani ushtria ka treguar pak prirje për të ndjekur penalisht ata që refuzojnë ose shmangin rekrutimin.

Deklarata e Hamasit

Sipas Hamasit, plani për të pushtuar Qytetin e Gazës, në lidhje me të cilin qeveria izraelite njoftoi dje të mërkurën se po thërret 60 mijë rezervistë, dëshmon për “përbuzjen flagrante” të Izraelit për përpjekjet e ndërmjetësve, Katarit, Egjiptit, Shteteve të Bashkuara, për të përfunduar një marrëveshje armëpushimi, tha Hamasi në një deklaratë.

“Njoftimi i ushtrisë pushtuese terroriste për të nisur një operacion kundër Qytetit të Gazës dhe gati një milion banorëve të tij dhe të zhvendosurve dëshmon përbuzje të hapur për përpjekjet e bëra nga ndërmjetësuesit me qëllim përfundimin e një marrëveshjeje armëpushimi dhe lirimin e pengjeve në Rripin e Gazës”, tha lëvizja islamiste palestineze.

“Ndërsa Hamasi njoftoi se pajtohet me propozimin e fundit të paraqitur nga ndërmjetësuesit, Izraeli këmbëngul të vazhdojë luftën e tij barbare dhe nuk i përgjigjet propozimit, kryeministri izraelit Benjamin Netanyahu tregon se ai është pengesa e vërtetë për çdo marrëveshje, se nuk interesohet për jetën e pengjeve dhe nuk ka asnjë qëllim serioz për t’i rimarrë ata”, shkruhej në deklaratën e Hamasit.

Top Channel