Sport Të Fundit

Kampionati në “fije të perit”! Serie A zbulon datën, ja kur Napoli dhe Interi do të luajnë në distancë për Scudetto-n

19/05/2025 13:19

Serie A hyn në fazën përfundimtare me ndeshjet e fundjavës që mund të shpallin kampionin e ri të Italisë.

Më 23 maj, Napoli dhe Cagliari do të luajnë në orën 20:45, ndërsa Como dhe Inter do të takohen po atë orë, në dy ndeshjet që mund të përcaktojnë fituesin e Scudetto-s.

Megjithatë, një ndeshje “play-off” është e mundshme dhe është planifikuar për të hënën, më 26 maj, në rast se të dyja ekipet e mbyllin kampionatin me pikë të barabarta. Ky vendim erdhi pas një videokonference të Këshillit të Ligës të mbajtur këtë mëngjes.

Përveç kësaj, të shtunën, Bolonja dhe Genoa do të luajnë në orën 18:00, ndërsa Milan dhe Monza do të takohen në orën 20:45, ndeshje pa ndonjë objektiv të madh për asnjërën nga ekipet.

Të dielën, ndeshjet e mëdha do të zhvillohen gjithashtu në orën 20:45, ku do të jenë në lojë vendet për Evropë dhe siguria në Serie A: Atalanta-Parma, Empoli-Verona, Lazio-Lecce, Torino-Roma, Udinese-Fiorentina dhe Venezia-Juventus.

Në këtë ditë do të përcaktohen edhe ekipet që do të luftojnë për të siguruar vendin në garat europiane, ndërsa një vend në Serie B mbetet ende i papërcaktuar.

Në një tjetër zhvillim, klubi i Interit ka kërkuar që ndeshja e mundshme për titull të luhet më herët, ndërsa Napoli ka insistuar për një kalendar që lejon një mundësi më të madhe për të festuar titullin në mënyrë të natyrshme.

Në rast barazimi të pikëve mes Napoli dhe Inter, ndeshja e mundshme play-off do të zhvillohej në San Siro, por për arsye të rendit publik, mund të zhvendoset në stadiumin Olimpico të Romës, siç sugjeroi presidenti i Lega Serie A, Ezio Simonelli.

Ndërkohë, gjithçka mbetet e hapur për vendin e kampionit, dhe gjithçka mund të përcaktohet nga këto ndeshje të fundit.