Serie A/ Interi nuk përfiton nga gafa e Napolit, Lazio barazon në fund zikaltrit! Titulli vendoset javën e fundit 18/05 22:59
Carlos Alcaraz është shpallur kampion i Italian Open 2025, duke fituar për herë të parë në karrierën e tij turneun prestigjioz në Romë. Tenisti spanjoll mposhti në finale vendasin Jannik Sinner me rezultatin 6-7, 6-1, në një përballje që nisi e balancuar por përfundoi në dominim total të Alcaraz.
Finalja e zhvilluar në Fushën Qendrore të Foro Italico nisi me intensitet të lartë dhe shkëmbime të forta, ku Sinner qëndroi denjësisht përballë numrit dy të botës.
Italiani pati dy mundësi për të fituar setin e parë në 6-5, por Alcaraz reagoi me gjakftohtësi dhe triumfoi në tie-break.
Në setin e dytë, tabloja ndryshoi tërësisht: Sinner u shfaq i lodhur fizikisht, ndërsa Alcaraz shtoi ritmin dhe dominoi totalisht, duke e mbyllur ndeshjen brenda pak më shumë se gjysmë ore me rezultatin e thellë 6-1.
Kjo ishte një rikthim i bujshëm për Alcaraz, i cili vjen pas një periudhe të vështirë përballë konkurrencës, por në fushat me dhe të kuq të Romës tregoi formë të shkëlqyer dhe riktheu autoritetin e tij në tenis.
Ndërkohë, Jannik Sinner, i kthyer në lojë pas një mungese tremujore për shkak të çështjes së ndjeshme “Clostebol”, tregoi shkëndija në fillim por nuk arriti të përballonte intensitetin e një kundërshtari të këtij niveli. Edhe pse për një set i bëri ballë spanjollit, lodhja dhe mungesa e formës fizike bënë të vetën në vazhdim.
Ky është një tjetër trofe i rëndësishëm për Alcaraz, i cili konfirmon se mbetet një ndër yjet më të ndritur të gjeneratës së re në botën e tenisit.
Top Channel
