Dita e Librit! Realiteti i ri përballë zhvillimeve teknologjike, studiuesit shpjegojnë sfidat
23/04 20:44
HangArt është një vatër e re kulture, një hapësirë më shumë për artistët, që u çel në ambientet e ish-Kinostudios në kryeqytet.
Kjo është një ngjarje që bashkon skenën e pavarur, institucionet kulturore dhe partnerët e tyre, u shpreh ministri i Ekonomisë, Kulturës dhe Inovacionit, Blendi Gonxhe në eventin inaugurues.
Ministri foli për projektet e reja artistike për këtë vit, teksa sipas tij, buxheti për mbështetjen e artit, kulturës dhe trashëgimisë kulturore është rritur me 45%, në krahasim me janarin 2024.
“Viti 2025 sjell 3.500 evente nga skena e pavarur artistike, institucionet e artit dhe kulturës, Javët Ndërkombëtare të Kulturës dhe Ditët Shqiptare të Kulturës, ose +52% aktivitete më shumë se viti 2024, me 600 mijë spektatorë të pritshëm, +33% rritje! Edukim, angazhim rinor, turizëm e ndërkombëtarizim”.
Gjatë vitit 2025, do të përgatitet Strategjia Kombëtare e Kulturës 2026-2030 me fokus vizatimin e një plani të qëndrueshëm e afatgjatë për zhvillimin e artit e kulturës në Shqipëri, theksoi Gonxhe.
“Strategjia do të parashikojë reformat e nevojshme ligjore në fushën e artit, kulturës dhe trashëgimisë kulturore, mekanizmat dhe strukturimet e nevojshme për mbështetjen për artistët shqiptarë dhe profesionistët e kulturës përmes politikave kombëtare por edhe nxitjes së tregut privat, promovimin dhe menaxhimin e trashëgimisë kulturore (muze, parqe arkeologjike, kala dhe objekte të trashëgimisë kulturore), rrjetëzimin, zhvillimin dhe mbështetjen e qëndrueshme të artizanatit, si dhe fuqizimin e qendrave kulturore e artistike”.
Nga HangArt, u prezantua dhe nisja e edicionit të katërt të Javëve Kulturore Ndërkombëtare CulturAlb, rrjeti i qendrave për promovimin e kulturës shqiptare në botë, programi Kombëtar i Granteve për Kulturën dhe Krijimtarinë si mbështetje për skenën e pavarur artistike.
Top Channel
