Recitali i Violeta Beshirit! Këngëtarja 16-vjeçare interpreton për herë të parë në Durrës

Fituese e shumë çmimeve në festivale të ndryshme brenda dhe jashtë vendit, si dhe pjesëmarrëse në një nga edicionet e The Voice Kids, 16-vjeçarja solli para publikut një repertor të pasur artistik ku spikatën këngët popullore të Shqipërisë së Mesme, një traditë që ajo e çon përpara plot finesë dhe dinjitet.

“Në repertorin tim ka lloje të ndryshme zhanresh, duke nisur që nga këngët për fëmijë, këngë popullore po ashtu që besoj se janë arma ime e fortë që më ka ndihmuar shumë, po ashtu kam këngë moderne dhe operistike”, tha kwngwtarja Violeta Beshiri.

“Ka shumë të rinj të brezit të saj që këndojnë muzikë të huaj, po mosha e saj të këndojë dhe të përthithë kaq mirë melodikën e këngëve të Shqipërisë së mesme është një gjë e rrallë”, tha kompozitori Ylli Ramzoti.

Moment i veçantë gjatë koncertit ishte dhe interpretimi instrumental së bashku me mësuesen e saj të muzikës Edmonda Rotani së cilës i është mirënjohëse për rrugëtimin e saj muzikor.

Edhe dueti me këngëtaren e mirënjohur Liljana Kondakçi erdhi si një surprizë për artdashësit e shumtë në sallë, ndërsa Violeta mori vlerësimet e artistes për këtë arritje të saj.

“Violeta një vajzë e bukur me një zë të ëmbël, me një nisëm të jashtëzakonshme që nuk e kam ndeshur gjëkundi, një 16-vjeçare të bëjë një recital madhështor me këngë botërore dhe muzikë popullore. I uroj suksese të mëtejshme. Jam pa fjalë“, tha ajo.

“Jo vetëm zërin, por ka dhe një interpretim shumë të mirë, me nivel”, tha kompozitori Ylli Ramzoti.

E ardhmja duket e sigurte për 16-vjeçaren e cila i ka të qarta synimet e saj në vazhdim.

“Aspiroj që të jem një këngëtare e madhe jo vetëm në Shqipëri, por edhe në Europë, por dua të bëj edhe diccka tjetër që të ndjehem e plotësuar”, tha Violeta Beshiri.

Gjatë koncertit 16-vjeçarja u nderua me titullin “Zëri brilant” i Durrësit nga shoqata e artistëve dhe shkrimtarëve durrsakë.

Top Channel