Forca të shumta të policisë dhe Drejtorisë së Burgjeve kanë shoqëruar nga burgu për në Vlorë, Sokol Sinomati, babain e 22-vjecarit Gëzim Sinomati, që u vra dy ditë më parë.
Ai ka marrë leje te posaçme për të qenë në ceremoninë e varrimit të të birit, që u ekzekutua të dielën në mbrëmje me një armë snajper.
Gazetari Mikel Marsi raporton se janë angazhuar rreth 100 forca të policisë dhe RENEA-s në Vlorë si dhe punonjës civilë të policisë.
I kthyer pak ditë më parë nga Belgjika për të festuar Vitin e Ri pranë familjes, 22-vjeçari u qëllua me snajper nga persona ende të paidentifikuar, duke ndërruar jetë në vend. Autorët u larguan nga vendi i ngjarjes, ndihmuar edhe nga errësira, dhe dogjën automjetin tip “BMW” me të cilin dyshohet se kryen krimin. Automjeti u gjet nga policia duke u djegur në lagjen “24 Maji”.
Emri i tij, veçanërisht mbiemri është i njohur për drejtësinë. Para disa kohësh i është vendosur dhe tritol në afërsi te banesës së tij.
22-vjeçari Gëzim Sinomati është djali i Sokol Sinomatit i cili njihet me nofkën “buzëderri”. Ai u arratis nga burgu i Peqinit në vitin 2017, pasi kishte marrë leje dhe nuk u kthye më. Në vitin kur u arratis, Sokol Sinomati vazhdonte të vuante dënimin për vrasjen e Elton Tatos dhe plagosjen e Robert Borakut, ngjarje që sipas vendimit të gjykatës së Vlorës ka ndodhur në qershor të vitit 2002.
Disa vite më vonë, ai u arrestua sërish në Belgjikë dhe u dënua për arratisje. Pista kryesore e hetimit për vrasjen e 22-vjeçarit është pikërisht e shkuara e errët e të atit, megjithatë hetimet pritet të zbardhin më tej ngjarjen.
Top Channel
