Arrestohen 7 të dyshuar për krime lufte në Srebrenicë

15/12/2023 17:35

Shtatë persona, përfshirë komandantë dhe anëtarë të Brigadës së Zvornikut të ish-ushtrisë së Republikës Sërpska, janë arrestuar nën dyshimin për krime lufte gjatë gjenocidit të kryer nga serbët e Bosnjës kundër mijëra burrave myslimanë në Srebrenicë në vitin 1995, sipas zyrtarëve boshnjakë.

Të dyshuarit u arrestuan nga Agjencia shtetërore për Hetime dhe Mbrojtje (SIPA) në afërsi të Zvornikut, tha kjo agjenci pa treguar datën e kapjes së tyre.

SIPA theksoi se të arrestuarit do t’i dorëzohen Zyrës së Prokurorit të Bosnjë e Hercegovinës, pas hetimeve shtesë.

Zyra e Prokurorit konfirmoi për Radion Evropa e Lirë se në mesin e të dyshuarve ka komandantë të ish-brigadës së Zvornikut.

Trupat serbe të Bosnjës vranë më shumë se 8.300 kryesisht burra dhe djem boshnjakë brenda dhe përreth Srebrenicës në korrik të vitit 1995, pasi paqeruajtësit holandezë të OKB-së dështuan të mbronin një “zonë të sigurt” të OKB-së.

Autoritetet thanë se shtatë personat e arrestuar dyshohen për vrasjen e rreth 800 boshnjakëve afër Orahovacit, pasi kjo zonë ishte pushtuar nga ushtria e Republikës Sërpska.

Ish-Gjykata Penale Ndërkombëtare për ish-Jugosllavinë dhe Gjykata Ndërkombëtare e Drejtësisë e kanë shpallur gjenocid këtë tragjedi.

Më shumë se 50 njerëz janë ndëshkuar me dënime me burgim për gjenocid dhe krime të tjera në Srebrenicë.

Trupat e viktimave janë nxjerrë nga më shumë se 80 varre masive në Srebrenicë dhe në zonat e afërta Zvornik dhe Bratunac.

Radovan Karaxhiç, presidenti i parë i Republikës Sërpska, entitetit kryesisht serb i cili bashkë me federatën boshnjake dhe atë kroate u dënua me burgim të përjetshëm për gjenocid dhe krime të tjera, përfshirë në Srebrenicë. Ai po vuan dënimin në një burg britanik.

Edhe komandanti i ish-ushtrisë së Republikës Sërpska në atë kohë, Ratko Mlladiç, po vuan dënimin me burgim të përjetshëm për gjenocid.

Top Channel