Kujdes nga mashtrimet/ Policia: Mos blini në faqe të dyshimta në internet

Sipas policisë, në rastet kur përdoruesit e interesuar, vendosin të dhënat e tyre personale apo bankare, për të bërë porosinë për produktin e reklamuar, produkti nuk dërgohet në destinacion dhe të dhënat e klientëve merren nga personat që kanë krijuar këto profile fallco.

Siç shihet nga fotoja, në postime ka komente nga përdorues të ndryshëm që shkruajnë shqip, por profili i tyre, përfshirë foton, emrin dhe mbiemrin, tregojnë që jo vetëm që nuk janë shqiptarë por edhe të dyshimtë.

Komentet janë të tilla si: “Kam pesë vite që blej produkte në këtë dyqan”; ofertë interesante dua një valixhe të tillë”; “Ka provuar dikush të porosisë?”

Këto komente marrin like dhe reagime të ndryshme, që mund të rrisin besueshmërinë tek të tjerët.

Policia këshillon të gjithë që të sigurohen për autenticitetin e faqes apo të profileve që mund të shikoni, përpara se të kryeni porositë tuaja, në mënyrë që të mos bini pre e këtyre mashtrimeve.

Gjithashtu policia fton të gjithë qytetarët që mund të jenë të dëmtuar nga ky aktivitet, ose që konstatojnë faqe të tilla, të paraqiten në Sektorin për Hetimin e Krimeve Kibernetike, në DVP Tiranë.

Hetimi erdhi nga Sektori për Hetimin e Krimeve Kibernetike në Drejtorinë Vendore të Policisë Tiranë, gjatë monitorimeve të kryera në burimet e hapura dhe në rrjetet sociale, me qëllim parandalimin e veprimtarive kriminale në fushën e krimeve kibernetike.

Top Channel