Presidentja e Kosovës, Vjosa Osmani ka bërë të ditur se ditën e sotme ka zhvilluar shkurtimisht një takim të përbashkët me presidentin e Serbisë, Aleksandar Vuçiç, në Moldavi, ku ishin të pranishëm edhe presidenti i Francës, Emanuel Macron, kancelari gjerman Olaf Scholz dhe shefi për Politikë të Jashtme të BE-së, Josep Borrell.
Përmes një interviste për RTK nga Moldavia, Osmani tha se në takimin që u zhvillua me kërkesë të Scholz dhe Macron, i kërkoi Vuçiçit të largojë bandat nga Veriu dhe të fillojë zbatimin e marrëveshjeve. Udhëheqësja kosovare sqaroi se para se të ulej në të njëjtën tryezë me Vuçiç, të dy palët zhvilluan takime ndarazi me Macron, Scholz dhe Borrell.
“Në fund të takimit me Macron dhe Scholz ata propozuan që të kishte edhe një diskutim joformal me presidentin e Serbisë, natyrisht në takim ishte edhe përfaqësuesit i Lartë i BE-së, Josep Borrell. E kishim një takim të përbashkët diku 10 minuta , ku edhe njëherë u dëshmua se Vuçiç nuk është i interesuar për zgjidhje dhe as për paqe, por në fakt është burimi kryesor i jostabilitetit në gjithë rajonin tonë. Por, unë do të vazhdojë të punoj me partnerët tanë, me Gjermaninë, me Francën, me SHBA-në si aleat yni kyç, por edhe me shtetet e tjera prej disa prej çështjeve që i propozuan edhe presidenti Macron, edhe kancelari Scholz, e që i ka propozuar edhe sekretari i shtetit amerikan, Blinken. Ka mundësi që të gjinden zgjedhje përpara. Vullnetin e kemi të përbashkët dhe ai është Kosova sovrane dhe e pavarur të jetë e suksesshme në gjithë territorin e saj. Natyrisht asnjëherë duke mos i ikur obligimeve që t’i mbrojmë të gjithë qytetarët, përfshirë edhe pakicën serbe”- ka theksuar Osmani.
Nga Kishinau, ku ndodhet për Samitin e dytë të Komunitetit Politik Evropian, Osmani ka thënë se zgjidhjet për shtensionim të situatës ekzistojnë por ato duhet të jenë në përputhshmëri me Kushtetutën e Kosovës.
“…e kam bërë të qartë se unë nuk negocioj sepse negociatat bëhen në Bruksel dhe Gjykata Kushtetuese e ka përcaktuar qartë se kush i zhvillon ato negociata. Megjithatë si presidente e vendit natyrisht i respektoj propozimet e aleatëve tanë, të cilët kanë dhënë dhe vazhdojnë të japin shumë për stabilitetin në Kosovë dhe rajon. Jemi ulur kemi diskutuar. Unë para tyre kam kërkuar nga Vuçiçi që të largojë ushtrinë nga kufiri, që t’i largojë bandat kriminale nga Kosova. Që të zbatojë listën e gjatë të marrëveshjeve të cilat nuk i ka zbatuar. E kam pyetur se a ka marrëveshje apo jo sipas tij sepse ai paraqitet para palëve të tjera kinse i respekton marrëveshjet por publikisht del dhe thotë se nuk do t’i zbatojë. Pra, janë gjëra që i kemi bërë në mënyrë shumë korrekte dhe konstruktive, siç janë kërkesat për sqarime, duke treguar se ne jemi të gatshëm ta gjejmë rrugën përpara bashkë me aleatët. Ne bisedojmë me ta për rrugën përpara, kurse obligimet që Kosova i ka marrë në marrëveshje, edhe njëherë sot kam treguar se të gjitha institucionet tona janë të përkushtuara t’i zbatojnë dhe nuk do të ikim prej tyre. Në anën tjetër Vuçiç si zakonisht ankohet, bërtet e shumëçka tjetër, por kjo është natyra e tij”, ka shtuar Osmani.
Presidentja e Kosovës u shpreh se “Vuçiç nuk kishte asnjë përgjigje në kërkesat tona dhe si zakonisht kalonte menjëherë në akuza e shumëçka tjetër”, veprime të cilat ajo i vlerëson si një mentalitet i së kaluarës.
Osmani ka thënë se ka qenë kërkesë e qartë edhe e Gjermanisë dhe Francës, që kurdo që organizohen zgjedhjet të ketë participim, mos t’u ndalohet serbëve dhe të mos ketë presion mbi ta që ata të marrin pjesë në zgjedhje. Por, sipas presidentes as në këtë kërkesë Vuçiç nuk kishte përgjigje.
Ajo ka thënë se brenda ligjeve dhe Kushtetutës së Kosovës ekziston mundësia që të ketë zgjedhje të reja, mirëpo është me rëndësi që serbët në veri të marrin pjesë në to, ta shfrytëzojnë participimin. “Pra ata duhet të marrin pjesë dhe t’i zgjedhin kryetarët që dëshirojnë dhe të sigurohen për respektimin e të drejtave të tyre nëpërmjet përfaqësuesve që ata i zgjedhin”, është shprehur Osmani, duke mos e përjashtuar këtë veprim si zgjidhje për shtensionimin e situatës.
“Ligjet tona lejojnë zgjedhje të reja nëse ka një përqindje të caktuar të qytetarëve që janë në listën e votimeve e iniciojnë një procedurë të tillë. Pra nëse ka procedura të tilla institucionet tona detyrohen të veprojnë”, ka nënvizuar Osmani.
Top Channel
