Ned Price largohet nga posti i zëdhënësit, merr detyrë tjetër në DASH

I kthyer prej kohësh në imazhin e Departamentit Amerikan të Shtetit, pas dy vitesh në këtë post, zëdhënësi i këtij dikasteri kyç të administratës amerikane do të lërë detyrën, për të marrë një pozicion të ri pranë shefit të diplomacisë së SHBA-së, Antony Blinken.

Ishte vetë kreu I DASH që e bëri publik lajmin. Price e bëri betimin më 20 janar 2021, pikërisht në ditën kur Joe Biden u inaugurua si president. Ai e mbajti me sukses këtë post në një periudhë mjaft të rëndësishme për politikën e jashtme të SHBA-së gjatë agresionit rus ndaj Ukrainës, si edhe tërheqjes kaotike të diplomatëve dhe personelit tjetër nga Afganistani.

Me tone të larta vlerësuese, Blinken u shpreh se Price mbajti më shumë se 200 konferenca për shtyp, duke u shndërruar në fytyrën dhe zërin e politikës së jashtme amerikane. “Ai e ndihmoi qeverinë të mbrojë dhe nxisë lirinë e shtypit në mbarë globin dhe ka dhënë shembullin e transparencës dhe sinqeritetit për të cilat ne bëjmë thirrje në vendet e tjera. Ndikimi i tij di të ndjehet në Departamentin e Shtetit për shumë kohë pasi ai të lërë detyrën” tha kryediplomati.

Në mënyrë të vecantë, Shaun Tandon, president i Shoqatës së Korrespondentëve të Departamentit të Shtetit, kujtoi rolin Price për rikthimin e konferencave të përditshme të shtypit dhe përballjen e tij me pyetjet e vështira të gazetarëve, si në rastin e tërheqjes nga Afganistani.

“Falë Nedit, konferenca e përditshme e shtypit duket tani rutinë dhe kështu duhet të jetë. Ajo ofron një mundësi për shtypin nga e gjithë bota që të shtrojë pyetje për politikën e jashtme të Shteteve të Bashkuara, shpesh në mënyrë kritike,”, tha Tandon, duke e përshkruar këtë si tregues i shëndetit të demokracisë amerikane.”

Top Channel